Fitorja 1-0 ndaj Teutës, që i dha Egnatias kreun e Abissnet Superiore, është lënë në hije nga dëmtimi i rëndë i Eljon Sotës. Mbrojtësi i rrogozhinasve pësoi një dëmtim në kavilje dhe u transportua drejt spitalit, ndërsa raportimet e para flasin për një frakturë që mund ta mbajë jashtë fushave deri në fund të vitit.
Incidenti ndodhi në minutën e 49-të të takimit, kur Sota u dëmtua gjatë një aksioni mbrojtës. Futbollisti mbeti i shtrirë në fushë, duke shkaktuar shqetësim te shokët e skuadrës dhe stafi teknik.
Ndërhyrja e mjekëve ishte e menjëhershme, ndërsa në fushë u fut edhe ambulanca. Pas disa minutash ndërprerjeje, mbrojtësi u largua me barelë dhe u dërgua në spital për ekzaminime të mëtejshme.
Raportohet frakturë në kavilje, Sota rrezikon të mbyllë vitin
Sipas raportimeve pas vizitave mjekësore, Sota ka pësuar thyerje të kaviljes, një dëmtim që pritet ta mbajë larg fushave për një periudhë të gjatë.
Nëse konfirmohet shkalla e raportuar e dëmtimit, mbrojtësi mund të mos rikthehet në dispozicion të Egnatias gjatë vitit 2026. Ende nuk është bërë i ditur një afat zyrtar rikuperimi.
Largimi i tij detyroi trajnerin Nevil Dede të ndërhynte në formacion, duke aktivizuar Numan Ajetin në vend të mbrojtësit.
Shtohen problemet për Nevil Deden
Dëmtimi i Sotës vjen në një moment delikat për Egnatian, që kryeson kampionatin me 21 pikë dhe përballet me një kalendar të ngjeshur.
Rrogozhinasit kanë pasur edhe më parë probleme fizike me disa futbollistë të rëndësishëm. Eneo Bitri mungoi për disa javë, ndërsa Soumalia Bakayoko vijon të jetë jashtë fushave. Probleme me dëmtimet ka pasur edhe Fernando.
Tashmë, stafi teknik duhet të gjejë alternativa të tjera në qendër të mbrojtjes, ndërsa pret të mësojë kohën e saktë të rikuperimit të Sotës.
Për Egnatian, që sapo ka marrë vendin e parë pas fitores ndaj Teutës, mungesa e mbrojtësit përbën një shqetësim serioz në vazhdim të sezonit.




