Anis Mehmeti po kalon një periudhë të vështirë në Angli, ku prej shtatë javësh nuk po gjen hapësira në Premier League. Sulmuesi shqiptar ka mbetur jashtë planeve të Ipswich, ndërsa situata e krijuar mund të ndikojë në të ardhmen e tij gjatë merkatos së janarit.
Ipswich, që ndodhet në mesin e tabelës, u mposht dje 3-2 nga Manchester City. Edhe në këtë përballje, Mehmeti e ndoqi ndeshjen nga tribuna, duke regjistruar javën e shtatë radhazi pa aktivizim.
Mehmeti jashtë planeve, rikthehet interesimi nga Championship
Vendimi i futbollistit shqiptar për të mos pranuar një transferim në Championship gjatë verës duket se nuk ka dhënë rezultatet e dëshiruara. Mungesa e vazhdueshme e aktivizimit ngre pikëpyetje mbi pozicionin e tij në skuadër, ndërsa nuk përjashtohet mundësia që kjo situatë të lidhet edhe me qëndrimin e klubit ndaj vendimit të tij në merkaton e kaluar.
Ndërkohë, interesimi për Mehmetin nuk mungon. Derby dhe Birmingham janë rikthyer në garë për shërbimet e tij, pasi e kishin ndjekur edhe gjatë verës.
Ipswich kërkon 10 milionë euro, janari mund të sjellë ndryshime
Klubi anglez e ka vlerësuar kartonin e Mehmetit në rreth 10 milionë euro, shumë që deri tani ka qenë kërkesa për largimin e tij.
Megjithatë, mungesa e minutave dhe situata aktuale mund ta shtyjnë Ipswich të rishikojë pretendimet financiare gjatë merkatos së dimrit.
Një rol të rëndësishëm në zhvillimet e ardhshme do të ketë edhe dëshira e vetë futbollistit. Pas shtatë javësh në tribunë, janari mund të jetë momenti kur Mehmeti do të duhet të vendosë nëse do të vazhdojë të luftojë për një vend në skuadër apo do të kërkojë një aventurë të re.




