Eksperienca e Ledian Memushajt si trajner i Altamurës ka përfunduar shumë më shpejt nga sa pritej. Ish-mesfushori i Kombëtares shqiptare është shkarkuar nga klubi që militon në Serinë C italiane.
Memushaj e mori drejtimin e skuadrës gjatë verës, në atë që përfaqësonte detyrën më të rëndësishme të karrierës së tij si trajner. Altamura e nisi sezonin me ambicie për të qenë protagoniste në garën për ngjitjen, por rezultatet nuk përmbushën pritshmëritë e drejtuesve.
Humbja e fundit ndaj Catanias rezultoi fatale për teknikun shqiptar. Drejtuesit vendosën ta ndërprisnin bashkëpunimin pas vetëm nëntë ndeshjesh.
Gjatë kësaj periudhe, Memushaj regjistroi dy fitore, dy barazime dhe pesë humbje.
Në sezonin e kaluar, ish-futbollisti kuqezi ishte vlerësuar si një nga trajnerët me perspektivë pas punës së zhvilluar me skuadrën e Leonit në Serinë D. Tashmë, Memushaj mbetet në pritje të një mundësie të re për të vazhduar karrierën në pankinë.




