Etrit Berisha ka dalë hapur kundër idesë së afrimit të portierit italian Elia Kaprile në Kombëtaren shqiptare. Pas fitores 2-0 ndaj Finlandës në “Air Albania”, gardiani kuqezi komentoi interesimin e FSHF-së për portierin, duke theksuar se përparësi duhet t'u jepet futbollistëve shqiptarë dhe atyre që kanë kontribuar për Kombëtaren.
Në prononcimin për “SuperSport”, Berisha foli edhe për paraqitjen ndaj Finlandës, pritjen vendimtare që ruajti avantazhin e Shqipërisë dhe përballjen e fundit të grupit kundër Bjellorusisë.
Berisha kritikon idenë e afrimit të Kapriles
I pyetur për mundësinë që Elia Kaprile t'i bashkohet Shqipërisë, Berisha shprehu rezervat e tij për afrimin e futbollistëve që nuk kanë lidhje të drejtpërdrejta me vendin.
“Mendoj se duhet t'i jepet fokus lojtarëve shqiptarë apo të paktën atyre që kanë kontribuar në Shqipëri apo që janë rritur. Përndryshe Kombëtarja nuk do e ketë atë vlerësimin, fillon e merr lojtarë nga jashtë”, deklaroi portieri.
Berisha bëri një dallim mes futbollistëve me origjinë shqiptare dhe atyre që mund të afrohen pa pasur një lidhje të tillë.
“Nëse janë lojtarë që kanë kontribuar në një mënyrë apo tjetër, apo nëse janë shqiptarë, apo kanë pasur prindër, është diçka ndryshe”, shtoi ai.
Sipas portierit, një politikë e tillë përzgjedhjeje ngre pikëpyetje edhe për zhvillimin e futbollit vendas.
“Kjo mendoj më shumë i paraqet problemet e futbollit shqiptar mbi të gjitha se gjërat e tjera”, theksoi Berisha.
“Gabimet janë pjesë e lojës”
Portieri u ndal edhe te kartoni i kuq i marrë në ndeshjen e parë ndaj Finlandës, duke pranuar se ai episod ndikoi ndjeshëm në rrjedhën e takimit.
“Çdo ndeshje ka historinë e vet. Po ashtu edhe gabimet janë pjesë e lojës. Nuk është as i pari dhe as i fundit. Me siguri ishte një rast që e kondicionoi shumë ndeshjen”, u shpreh ai.
Berisha theksoi se skuadra duhet ta lërë pas atë episod dhe të përqendrohet te objektivi kryesor, vendi i parë në grup.
Berisha vlerëson Hasën dhe lojtarët e rinj
Gardiani kuqezi vlerësoi edhe cilësinë e grupit, duke veçuar ndërthurjen e futbollistëve me përvojë dhe talenteve të reja.
“Mendoj se kemi me të vërtetë kualitet. Është një miks i bukur i lojtarëve më me eksperiencë dhe lojtarë të rinj, që janë duke u futur dhe duke dhënë një kontribut jashtëzakonisht të mirë”, deklaroi Berisha.
Ai veçoi paraqitjen e Hasës, i cili u aktivizua gjatë ndeshjes.
“Sot dua të veçoj edhe Hasën që më pëlqeu shumë kur hyri, solli një freski”, tha portieri.
Berisha theksoi gjithashtu rëndësinë që futbollistët të kenë minuta të rregullta me klubet e tyre, për të qenë në gjendjen më të mirë fizike kur grumbullohen me Kombëtaren.
Pritja vendimtare ndaj Finlandës
Një nga momentet më të rëndësishme të ndeshjes ishte ndërhyrja e Berishës ndaj goditjes me kokë të Tenhos në pjesën e parë, kur Shqipëria kryesonte 1-0.
Portieri kujtoi se goditjet standarde kishin qenë problem në përballjen e mëparshme me finlandezët.
“E dinim se janë shumë të rrezikshëm në goditje standarde. Na bënë dy gola në herën e kaluar. Ishte goditje dhe situatë që mund të ndryshonte rrjedhën e lojës. Isha aty dhe më vjen mirë që kontribuova për ekipin”, deklaroi ai.
Objektivi ndaj Bjellorusisë: Vendi i parë
Në fund, Berisha foli edhe për ndeshjen e 15 nëntorit kundër Bjellorusisë, ku Shqipëria do të kërkojë të sigurojë kreun e Grupit C1.
“Pa tifozë do jetë ndoshta ndeshje e barabartë, por kjo nuk na kondicionon neve për të luajtur një lojë ndryshe. Ne jemi të fokusuar që të dalim të parët dhe kjo është gjëja që vlen më shumë”, përfundoi portieri.
Pas fitores ndaj Finlandës, Shqipëria ka 12 pikë dhe mbetet në garë për të siguruar vendin e parë dhe ngjitjen në Ligën B.




