Mirel Josa do të jetë trajneri i ri i Besëlidhjes. Palët kanë arritur marrëveshjen dhe tekniku 63-vjeçar do të marrë drejtimin e skuadrës lezhjane.
Josa ishte kandidati kryesor për pankinën që pas largimit të Elvis Plorit, rreth një muaj më parë. Klubi nuk u nxitua me zgjedhjen, ndërsa gjatë kësaj periudhe skuadra u drejtua përkohësisht nga Klevis Hima.
Drejtuesit i kanë besuar Josës objektivin e rikthimit të Besëlidhjes në “Abissnet Superiore”. Përvoja e tij e gjatë në futbollin shqiptar shihet si një element i rëndësishëm në garën për ngjitjen në elitë.
Angazhimi i fundit i trajnerit ishte në krye të Bylisit. Tashmë, Josa nis një tjetër aventurë në Kategorinë e Parë, këtë herë me misionin për ta kthyer Besëlidhjen mes skuadrave më të mira të vendit.




