Florin Bratu ka lënë të hapur mundësinë e largimit nga Partizani pas humbjes 3-1 në derbin me Tiranën. Trajneri rumun pranoi se katër pikë në gjashtë ndeshje janë shumë pak dhe paralajmëroi një takim me drejtuesit e klubit.
Bratu u shfaq i zhgënjyer me rezultatet dhe lojën e skuadrës. Ai mori përgjegjësinë për situatën, ndërsa shprehu keqardhje ndaj tifozëve të kuq.
“Nuk kemi pasur një fillim të mirë”
Trajneri kujtoi se Partizani është ndëshkuar edhe nga kartonët e kuq në javët e para, por pranoi se skuadra nuk ka arritur të gjejë ekuilibrin.
“Nuk kemi pasur një fillim të mirë të kampionatit. E nisëm me karton të kuq ndaj Teutës dhe më pas ndodhi e njëjta gjë me Laçin. Kemi pasur vështirësi për të gjetur balancën si skuadër. Fitorja ndaj Vllaznisë nuk është e mjaftueshme”, deklaroi Bratu për RTSH-në.
Sipas tij, Partizani pati mundësi për ta ndryshuar derbin kur rezultati ishte 1-1.
“Mendoj se meritonim më shumë. Humbëm tri raste shumë të mira në barazim dhe nuk patëm fat, por rezultati përfundimtar është kundër nesh”, shtoi ai.
“Punojmë, por skuadra nuk po përgjigjet”
Bratu pranoi se Partizani vuajti në tranzicion dhe nuk arriti të ndalte kundërshtarët në momentet vendimtare.
“Nuk gjetëm zgjidhje për t’i bllokuar në tranzicion. Bëmë një gabim dhe pësuam gol. Jam shumë i mërzitur, sepse punojmë vazhdimisht, por skuadra nuk po tregon mjaftueshëm në fushë. E di se përgjegjësia është e imja”, tha tekniku rumun.
Ai shpjegoi se Aliu u zëvendësua për shkak të problemeve fizike, ndërsa ndryshimet e tjera synonin t’i jepnin skuadrës më shumë forcë mes linjave.
Takim me drejtuesit për të ardhmen
I pyetur nëse do të japë dorëheqjen, Bratu nuk dha një përgjigje përfundimtare. Ai bëri të qartë se e ardhmja e tij do të diskutohet me drejtuesit.
“Katër pikë pas gjashtë ndeshjesh janë shumë pak. Të shohim çfarë do të ndodhë në ditët e ardhshme. Tani jemi të gjithë të mërzitur. Duhet ta kalojmë këtë natë dhe nesër të ulemi në tavolinë me drejtuesit për të folur mbi realitetin”, deklaroi trajneri.
“Ka shumë gjëra që duhet t’i diskutojmë dhe t’i rregullojmë. Është e vështirë të flas tani, sepse e di sa shumë rëndësi kishte kjo ndeshje për tifozët. Më vjen keq që nuk arritëm të fitonim”, përfundoi Bratu.




