TË FUNDIT
Kthehu te lajmet
Kategoria Superiore

Bratu para derbit të parë: “Duhet të luftojmë për tifozët, gjithçka varet nga rezultati”

Trajneri i Partizanit, Florin Bratu, ka dalë para mediave në prag të derbit të kryeqytetit ndaj Tiranës. Tekniku rumun foli për rëndësinë e sfidës, presionin mbi skuadrën dhe gjendjen e lojtarëve të dëmtuar.

Bratu para derbit të parë: “Duhet të luftojmë për tifozët, gjithçka varet nga rezultati”

Trajneri i Partizanit, Florin Bratu, ka dalë para mediave në prag të derbit të kryeqytetit ndaj Tiranës. Tekniku rumun foli për rëndësinë e sfidës, presionin mbi skuadrën dhe gjendjen e lojtarëve të dëmtuar.

Për Bratun do të jetë derbi i parë në pankinën e kuqe. Trajneri e di se fitorja ka një rëndësi të veçantë për tifozët, sidomos pas fillimit jo të mirë të Partizanit në kampionat.

“Ndoshta ndeshja më e rëndësishme e vitit”

Pushimi i kampionatit i ka dhënë stafit teknik më shumë kohë për të punuar me skuadrën dhe për të korrigjuar problemet e shfaqura në pesë javët e para.

“Këto javë kanë qenë shumë të rëndësishme për ne, sepse kemi pasur kohë të punojmë dhe të përmirësojmë gjërat që nuk kanë funksionuar. Tani është momenti që lojtarët të tregojnë në fushë punën e bërë”, deklaroi Bratu.

Ai e cilësoi derbin si një prej ndeshjeve më të rëndësishme të sezonit për ambientin e kuq.

“E di sa e rëndësishme është kjo ndeshje. Ndoshta është më e rëndësishmja e vitit për tifozët tanë dhe e respektoj këtë. Duhet të luftojmë për ta, sepse do të jenë të shumtë në stadium. Është derbi im i parë dhe të gjithë tifozët e Partizanit kërkojnë fitoren”, shtoi trajneri.

Skuka rikthehet në stërvitje

Partizani vazhdon të ketë probleme me dëmtimet. Preka dhe Malaj nuk janë rikuperuar, ndërsa aktivizimi i Pasagiçit mbetet në dyshim.

“Preka dhe Malaj vazhdojnë të jenë të dëmtuar. Pasagiç ka qenë i sëmurë gjatë javës dhe presim të shohim nëse do të rikuperohet. Xhuljano Skuka ka pasur një dëmtim, por këtë javë është stërvitur normalisht me skuadrën. Vendimin do ta marrim para ndeshjes”, shpjegoi Bratu.

“Presioni është normal”

Trajneri rumun e pranoi se rezultatet e dobëta kanë rritur presionin, por u shpreh se është mësuar të punojë në ambiente ku kërkohet fitorja.

“Është normale të ketë presion. Kam luajtur në nivele të larta dhe kam drejtuar skuadra të mira. Partizani është një klub i madh dhe e di se gjithçka varet nga rezultatet. Duhet të japim maksimumin dhe ta fitojmë ndeshjen”, përfundoi Bratu.