TË FUNDIT
Kthehu te lajmet
Kategoria Superiore

Bratu shpërthen pas largimit nga Partizani: Probleme me fenë, pagat dhe merkaton

Florin Bratu ka thyer heshtjen pas largimit nga Partizani.

Bratu shpërthen pas largimit nga Partizani: Probleme me fenë, pagat dhe merkaton

Florin Bratu ka thyer heshtjen pas largimit nga Partizani, duke folur për herë të parë mbi eksperiencën e tij në krye të skuadrës së kuqe. Në një intervistë për “Digi Sport”, trajneri rumun ka renditur disa nga vështirësitë që, sipas tij, ndikuan në rezultatet e dobëta, duke përmendur buxhetin e kufizuar, kushtet e stërvitjes dhe përshtatjen me kulturën vendase.

Megjithatë, deklaratat e ish-teknikut përmbajnë edhe disa pasaktësi, veçanërisht sa u përket fitoreve të regjistruara dhe numrit të futbollistëve të afruar gjatë drejtimit të tij.

Bratu: Më duhej të përshtatja stërvitjet me oraret e faljes

Trajneri rumun e përshkroi aventurën në Shqipëri si një eksperiencë pozitive, por të shoqëruar me vështirësi organizative dhe kulturore.

“Ishte një përvojë e mirë, e bukur, por e ndërlikuar. Kemi fituar dy nga gjashtë ndeshjet. Ishte e ndërlikuar nga pikëpamja kulturore. Është një vend ku 70–80% e popullsisë janë myslimanë. Më duhej t’i përshtatja oraret e stërvitjes me oraret e tyre të faljes, gjë që e bënte situatën të vështirë”, deklaroi Bratu.

Ai shtoi se mungesa e ambienteve të zakonshme stërvitore kishte ndikuar gjithashtu në organizimin e punës.

“Duhej të stërviteshim në mëngjes ose në mbrëmje, por jo në orën 7 të mëngjesit. Meqenëse i gjithë kompleksi ynë stërvitor ishte në rikonstruksion, na duhej të stërviteshim në ambientet e Federatës Shqiptare të Futbollit. Por, meqë i pranova këto rrethana, nuk ka më kuptim të ndalemi tek ato”, u shpreh ish-trajneri i të kuqve.

Buxheti dhe merkatoja, një tjetër problem sipas rumunit

Bratu e lidhi ecurinë e skuadrës edhe me mundësitë financiare të klubit, duke pretenduar se investimet në merkato nuk ishin të mjaftueshme për të ndërtuar ekipin që dëshironte.

“Ndoshta mund të ishte bërë më shumë. Përgatitjen e bëmë mirë. Sikur të kishte pasur pak më shumë investime… Arrita të sillja vetëm tre lojtarë dhe kjo e vështirësoi situatën. Na u desh të punonim brenda një buxheti relativisht të vogël”, tha ai.

Megjithatë, gjatë periudhës kur rumuni drejtonte Partizanin, klubi prezantoi pesë futbollistë: Endri Çelajn, Ersi Kapon, Omar Pasagiçin, Altin Aliun dhe Alesio Mijan.

Mbetet e paqartë nëse Bratu u referohej vetëm lojtarëve të kërkuar personalisht prej tij apo nëse nuk i konsideronte të gjitha afrimet si përforcime për skuadrën.

“Te Partizani pagat ishin 4-5 mijë euro, te rivalët deri në 12 mijë”

Një nga deklaratat që tërhoqi më shumë vëmendje lidhej me diferencat financiare mes Partizanit dhe kundërshtarëve në Kategorinë Superiore.

Sipas Bratut, futbollistët e Teutës dhe Egnatias përfitonin paga dukshëm më të larta sesa lojtarët e skuadrës që ai drejtonte.

“Te skuadra si Teuta dhe Egnatia, lojtarët marrin paga prej 10 deri në 12 mijë euro në muaj, ndoshta edhe më shumë. Te skuadra jonë, paga mesatare ishte diku te 4 deri në 5 mijë euro në muaj. Egnatia ka paga të mira”, deklaroi rumuni.

Këto shifra janë pretendime të ish-trajnerit dhe nuk shoqërohen me dokumentacion financiar që të konfirmojë pagat e përmendura.

Statistikat kundërshtojnë Bratun, vetëm një fitore në gjashtë ndeshje

Përtej shpjegimeve të dhëna në intervistë, Bratu nuk ishte i saktë kur deklaroi se kishte fituar dy nga gjashtë ndeshjet e zhvilluara në kampionat.

Në fakt, Partizani regjistroi vetëm një fitore gjatë drejtimit të tij, atë ndaj Vllaznisë.

Të kuqtë morën gjithashtu një barazim kundër Teutës, ndërsa u mundën nga Laçi, Dinamo, Egnatia dhe Tirana.

Pas gjashtë javëve të para të Superiores, Partizani kishte grumbulluar vetëm katër pikë dhe ndodhej në vendin e parafundit të renditjes.

Problemet ishin të dukshme edhe në mbrojtje, me 13 gola të pësuar në gjashtë takime, një bilanc që rëndoi më tej situatën e skuadrës.

Kështu, ndërsa Bratu e shpjegon eksperiencën e tij të shkurtër në Shqipëri përmes vështirësive financiare dhe organizative, rezultatet në fushë tregojnë se Partizani nuk arriti të gjente stabilitetin e kërkuar gjatë drejtimit të tij.