Burnley po kalon një periudhë të vështirë në kampionat, ndërsa as Armando Broja nuk po arrin të bëjë diferencën. Sulmuesi i Kombëtares shqiptare mori një vlerësim të ulët pas humbjes ndaj Wolverhampton, rezultat që ka shtuar tensionet në klub dhe pakënaqësinë e tifozëve.
Broja u aktivizua në minutën e 62-të, duke zëvendësuar Vardin, por nuk arriti të ndryshonte rrjedhën e takimit. Në minutën e 81-të, shqiptari goditi shtyllën pas një krosimi në zonë, megjithëse aksioni u ndërpre për pozicion jashtë loje.
Broja vlerësohet me notën 5
Media lokale “Burnley Express” e vlerësoi paraqitjen e sulmuesit kuqezi me notën 5, njësoj si disa prej shokëve të skuadrës.
Në analizën e saj, media angleze kritikoi mungesën e iniciativës nga Broja, duke theksuar se sulmuesi qëndroi më shumë në pritje të topit sesa u përpoq të përfshihej aktivisht në lojë.
Edhe rasti i minutës së 81-të, kur goditi traversën nga afërsia, nuk ndikoi në vlerësimin e tij, pasi shqiptari ishte sinjalizuar në pozicion jashtë loje.
Burnley një vit pa fitore në shtëpi, tifozët kërkojnë largimin e pronarit
Situata e Burnley është rënduar pas humbjes ndaj Wolverhampton. Skuadra, që po lufton për mbijetesën, ka plot një vit pa regjistruar fitore në shtëpi në ndeshjet e kampionatit.
Rezultatet negative kanë shtuar pakënaqësinë e tifozëve, të cilët pas përfundimit të takimit protestuan kundër pronarit Alan Pace, që zotëron aksionet e klubit prej gjashtë vitesh.
Mbështetësit tentuan të shpalosnin një banderolë me mbishkrimin “Pace largohu”, por u penguan nga punonjësit e sigurisë private dhe policia.
Protestat vazhduan me thirrje kundër drejtuesit të klubit, ndërsa nga tribunat u dëgjua edhe slogani “Alan Pace, largohu nga klubi ynë”.
Trajneri i Burnley reagon pas protestave
Pas ndeshjes, trajneri Hajen komentoi pakënaqësinë e tifozëve, duke pranuar se rezultatet e dobëta kanë krijuar një situatë të vështirë për skuadrën.
“E kuptoj plotësisht acarimin. E duan klubin, janë emocionalë. Pse? Sepse duan vetëm të fitojnë dhe më të mirën për klubin. Por ky është edhe qëllimi im.
Nuk kam ardhur këtu për të mërzitur ata apo dëmtuar klubin. Punoj me të vërtetë shumë fort për ndryshimin”, u shpreh trajneri i Bërnlit.
Burnley mbetet në një moment delikat të sezonit, me presionin që po rritet si ndaj stafit teknik, ashtu edhe ndaj drejtuesve. Ndërkohë, Armando Broja do të kërkojë të shfrytëzojë më mirë minutat në dispozicion për të ndihmuar skuadrën në luftën për mbijetesë.




