Një situatë e pazakontë është regjistruar në Kategorinë e Dytë. Luzi ka ndërprerë bashkëpunimin me trajnerin Alert Alcani vetëm dy javë pas emërimit të tij.
Shkak për largimin është bërë mosmarrëveshja rreth skemës së lojës. Alcanit i është kërkuar ta rreshtonte skuadrën me modulin 4-4-2, por trajneri nuk ka pranuar që zgjedhja taktike t’i imponohej.
Gjatë periudhës së shkurtër në drejtimin e Luzit, ish-futbollisti i Partizanit grumbulloi katër pikë. Rezultatet, megjithatë, nuk mjaftuan që bashkëpunimi të vazhdonte.
Klubi ka vepruar menjëherë për të plotësuar vendin e lënë bosh. Ndriçim Kashami është zgjedhur trajneri i ri i skuadrës.
Tekniku 56-vjeçar nga Kavaja ka drejtuar më parë ekipe si Besa, Egnatia, Besëlidhja dhe Apolonia. Tashmë ai nis një përvojë të re në pankinën e Luzit.




