TË FUNDIT
Kthehu te lajmet
Kombëtare

Daku dhe Seferi thumbojnë Sylvinhon, sulmuesit vlerësojnë qasjen e Maranit

Sylvinho nuk drejton më Kombëtaren shqiptare, por deklaratat e Mirlind Dakut dhe Taulant Seferit tregojnë se mes lojtarëve ka ende diçka për t’u thënë për periudhën e brazilianit.

Daku dhe Seferi thumbojnë Sylvinhon, sulmuesit vlerësojnë qasjen e Maranit

Sylvinho nuk drejton më Kombëtaren shqiptare, por deklaratat e Mirlind Dakut dhe Taulant Seferit tregojnë se mes lojtarëve ka ende diçka për t’u thënë për periudhën e brazilianit.

Dy sulmuesit kuqezi nuk e përmendën drejtpërdrejt ish-trajnerin, por krahasimet e tyre me mënyrën e punës së Rolando Maranit u lexuan si kritika të tërthorta ndaj stafit të mëparshëm.

Daku theksoi se, nën drejtimin e Maranit, çdo lojtar ndihet më i rëndësishëm brenda grupit.

“Përshtypje na ka lënë sepse të gjithë çunat që jemi të grumbulluar e ndiejmë rëndësinë tonë. Më herët nuk e kemi ndjerë këtë. Tani secili lojtar e kupton se ka vlerën e vet në Kombëtare. Kjo më ka bërë të ndihem më mirë se më parë. Për pjesën tjetër duhet të presim ndeshjen”, deklaroi sulmuesi.

Ironikisht, ishte pikërisht Sylvinho ai që e afroi Dakun në Kombëtare dhe i dha mundësinë të luante edhe si titullar. Sulmuesi nuk arriti të linte gjurmë me gola në ato raste, ndërsa tani mbetet për t’u parë nëse do të jetë më efektiv në skemat e Maranit.

Edhe Seferi mbështeti deklaratën e Dakut, duke vlerësuar mënyrën se si trajneri i ri sillet me futbollistët.

“Daku e tha shumë mirë. Trajneri ua jep vlerësimin të gjithë lojtarëve. Nëse do të luaj nga fillimi apo do të jem në stol, ky është vendimi i tij”, u shpreh Seferi.

Sulmuesi foli edhe për ndryshimin taktik mes dy trajnerëve. Sipas tij, Maran kërkon një Shqipëri më sulmuese, që mban topin dhe ushtron presion më lart.

“Ndryshimi nga më parë është se trajneri Maran dëshiron të luajmë me topin dhe kërkon futboll më ofensiv. Ai do që skuadra të bëjë presing. Për ne sulmuesit është më mirë kur ushtrojmë presion dhe e mbajmë më shumë topin. Këto ditë kemi punuar shumë për mënyrën se si do të dalim përpara. Më parë përqendroheshim më tepër në fazën mbrojtëse dhe e prisnim kundërshtarin”, përfundoi Seferi.

Deklaratat e dy sulmuesve nuk përbëjnë një sulm të drejtpërdrejtë ndaj Sylvinhos, por krahasimi mes dy periudhave ishte i qartë. Tani Dakut dhe Seferit u takon ta tregojnë në fushë nëse qasja e re do t’i ndihmojë të jenë më vendimtarë me fanellën kuqezi.