Nevil Dede nuk i fsheh ambiciet e Egnatias për transfertën ndaj Universitatea Craiovas. Në konferencën për shtyp përpara ndeshjes së tretë të fazës së ligës në Conference League, trajneri i kampionëve shqiptarë deklaroi se skuadra e tij do të luajë për tri pikët.
Tekniku foli edhe për gjendjen e futbollistëve të dëmtuar, duke konfirmuar mungesat e Eljon Sotës dhe Ildi Grudës, ndërsa aktivizimi i Eneo Bitrit mbetet në dyshim.
Dede: Kemi ardhur në Craiova vetëm për të fituar
Trajneri i Egnatias vlerësoi kundërshtarin rumun, por theksoi se skuadra e tij nuk do të ndryshojë mentalitetin me të cilin ka përballuar ndeshjet europiane.
Universitatea Craiova vjen në këtë takim pas një serie prej 12 ndeshjesh pa humbje, statistikë që, sipas Dedes, tregon formën e mirë të kundërshtarit.
Megjithatë, tekniku shqiptar e bëri të qartë objektivin e rrogozhinasve.
“Ne kemi ardhur në Kraiovë vetëm me një qëllim për të fituar ndeshjen. Nuk kemi ardhur për të barazuar ndeshjen. Nëse mendojmë që të marrim një barazim, Kraiova është shumë favorite në fushë. Ne pretendojmë të fitojmë ndeshjen tonë”, deklaroi Dede.
Ai kërkoi nga futbollistët të tregojnë besim dhe përgjegjësi, pavarësisht nivelit të kundërshtarit.
“Përveç respektit që e kemi detyrim karshi tyre, duhet të kemi besim dhe përgjegjësi tek ajo që ne ndërtojmë dhe punojmë”, shtoi trajneri.
Gruda dhe Sota jashtë, Bitri në dyshim
Problemet fizike mbeten shqetësimi kryesor i Egnatias për ndeshjen e 5 nëntorit.
Dede konfirmoi se Eljon Sota dhe Ildi Gruda kanë pësuar dëmtime serioze, ndërsa për mbrojtësin Eneo Bitri do të pritet deri në momentet e fundit.
“Lajmi jonë i keq është se kemi dy dëmtime serioze realisht. Ajo më e keqja e Sotës dhe Gruda që shpresojmë që për pak javë të na rikthehet”, u shpreh tekniku.
Për Bitrin, trajneri nuk dha garanci se do të jetë titullar apo se mund të aktivizohet.
“Bitrin shpresoj ta rikuperojmë deri nesër. Nuk e kemi 100 % të formës, deri nesër në mbrëmje kemi kohë për të marrë një vendim të saktë”, sqaroi ai.
Mbrojtësi është pjesë e kontingjentit që ka udhëtuar drejt Rumanisë, por pjesëmarrja e tij në ndeshje do të varet nga gjendja fizike.
“Po mbajmë lart flamurin e futbollit shqiptar”
Përtej rezultatit, Dede kërkon që Egnatia të ruajë nivelin e treguar deri tani në Conference League.
Kampionët shqiptarë kanë regjistruar dy barazime në dy ndeshjet e para ndaj Midtjylland dhe Aarhus, ndërsa trajneri synon që skuadra të vazhdojë të përfaqësojë denjësisht futbollin shqiptar.
“Duhet të mbajmë lartë nivelin dhe standartin që kemi krijuar. Po mbajmë lart flamurin e futbollit shqiptar”, deklaroi ai.
Dede shtoi se dëshiron që paraqitja e skuadrës në Rumani të jetë një arsye krenarie për klubin dhe tifozët shqiptarë.
“Nesër minimumi të jemi krenar, unë si trajner, por edhe klubi me performancën e djemve, por edhe gjithë shqiptarët të krenohen, që realisht kanë një skuadër që shkon kudo në Europë dhe përballet denjësisht”, theksoi tekniku.
Dede shmang polemikat për postimin e klubit
Gjatë konferencës, trajneri u pyet edhe për një postim të Egnatias në rrjetet sociale, por zgjodhi të mos komentonte.
“Nuk marr vesh shumë nga arti, marr vesh shumë nga topi. Nuk jam njeri i rrjeteve sociale, nuk e kam parë postimin e Egnatias”, tha Dede.
Ai theksoi se përgjegjësia e tij lidhet me aspektin sportiv dhe jo me komunikimin apo politikat e klubit.
“Për sa i përket politikave të tjera të klubit, nuk është përgjegjësia ime”, përfundoi trajneri.
Universitatea Craiova-Egnatia do të luhet më 5 nëntor, në orën 21:00, në stadiumin “Ion Oblemenco”.




