Derbi mes Tiranës dhe Dinamo City nuk do të zhvillohet në kryeqytet. Bardheblutë do ta presin rivalin në stadiumin “Niko Dovana” të Durrësit, më 29 tetor, duke nisur nga ora 13:30.
Vendimi vjen për shkak të problemeve me stadiumet në Tiranë, që e kanë detyruar klubin bardheblu të kërkojë sërish një alternativë jashtë kryeqytetit.
Nga Vora në Durrës, Tirana vazhdon të luajë larg shtëpisë
Pasi zhvilloi ndeshjen si pritëse kundër Laçit në Vorë, Tirana do të zhvendoset këtë herë në Durrës për një nga përballjet më të rëndësishme të kampionatit.
Stadiumi “Selman Stërmasi” ende nuk plotëson kushtet e nevojshme për të pritur ndeshje të “Abissnet Superiore”, ndërsa përdorimi i “Air Albania” mbetet një alternativë e kushtueshme.
Sipas raportimeve, edhe protestat studentore krijojnë pasiguri për organizimin e ndeshjes në stadiumin kombëtar.
Për këtë arsye, derbi i kryeqytetit do të luhet në “Niko Dovana”, një stadium që ka pritur edhe më parë përballje mes këtyre dy skuadrave.
Në vitin 2024, ishte Dinamo ajo që luajti si pritëse ndaj Tiranës në impiantin durrsak.
Derbi në orën 13:30, pavarësisht ndriçimit të stadiumit
Përveç ndryshimit të stadiumit, vëmendje ka tërhequr edhe orari i ndeshjes.
Federata Shqiptare e Futbollit ka programuar takimin për në orën 13:30, megjithëse stadiumi “Niko Dovana” ka mundësi të presë ndeshje edhe nën ndriçimin e prozhektorëve.
Kështu, një nga përballjet më të rëndësishme të futbollit kryeqytetas do të zhvillohet në Durrës dhe në mesditë, larg atmosferës së zakonshme të derbit në Tiranë.
Tirana – Dinamo City
Data: 29 tetor 2026
Ora: 13:30
Stadiumi: “Niko Dovana”, Durrës




