Dinamo mund të jetë pranë realizimit të një prej projekteve më të rëndësishme në historinë e saj. Klubi kryeqytetas pritet të ketë një stadium të ri në Arbanë, i cili do të shërbejë si shtëpia e përhershme e skuadrës.
Pas përgatitjes së projektit paraprak, puna po zhvendoset gradualisht në terren. Sipas afateve të parashikuara, makineritë pritet të mbërrijnë në zonë brenda dhjetë ditësh.
Punimet e para inxhinierike mund të nisin brenda 20 ditësh. Faza fillestare do të përfshijë rrethimin e zonës, sheshimin dhe sistemimin e terrenit, si dhe hapjen e rrugës që do të mundësojë hyrjen në kantier.
Projekti në pritje të lejes
Paralelisht me ndërhyrjet përgatitore, projekti pritet të dorëzohet për pajisjen me lejen e zhvillimit. Përfundimi i procedurave administrative do të hapte rrugën për kalimin në fazat kryesore të ndërtimit.
Këto punime janë ende pjesë e fazës paraprake, por përfaqësojnë lëvizjet e para konkrete drejt realizimit të stadiumit.
Fundi i shtegtimit për Dinamon
Një impiant i vetin do t’i jepte fund pasigurisë së vazhdueshme të Dinamos për zhvillimin e ndeshjeve si pritëse. Gjatë sezoneve të fundit, skuadra është detyruar të lëvizë mes stadiumeve “Air Albania”, “Elbasan Arena” dhe “Selman Stërmasi”.
Stadiumi në Arbanë synon t’i japë klubit një adresë të qëndrueshme dhe të krijojë një lidhje më të fortë me tifozët. Nëse afatet respektohen, brenda ditëve të ardhshme pritet të nisë puna në terren për shtëpinë e re të bluve.




