Teuta vazhdon marshimin në krye të Abissnet Superiore. Durrsakët mposhtën 2-0 Dinamon në “Elbasan Arena”, duke regjistruar një tjetër fitore të rëndësishme në javën e shtatë të kampionatit. Pedro dhe Arifi shënuan golat e suksesit për skuadrën e Edlir Tetovës, që tashmë numëron 19 pikë dhe ka krijuar një avantazh të përkohshëm prej katër pikësh ndaj Egnatias.
Përballja mes dy skuadrave u karakterizua nga rivaliteti në fushë, por edhe nga tensionet në pankinën e Dinamos, ku trajneri Ilir Daja pati disa përplasje verbale me gjyqtarin Ditmir Grimci.
Pedro kalon Teutën në avantazh, Daja përplaset me arbitrin
Durrsakët arritën të gjenin rrugën e rrjetës në minutën e 31-të. Një aksion i zhvilluar nga krahu krijoi hapësirën e nevojshme për Pedron, i cili u pozicionua në qendër të zonës dhe mposhti portierin kundërshtar.
Goli i dha mundësi Teutës të administronte avantazhin, ndërsa Dinamo u përpoq të gjente reagimin e duhur. Skuadra kryeqytetase hasi vështirësi për të depërtuar në mbrojtjen durrsake dhe nuk arriti të rikthente baraspeshën përpara pushimit.
Ndërkohë, disa vendime të arbitrit Ditmir Grimci shkaktuan pakënaqësi te Dinamo. Ilir Daja protestoi për ndërhyrjet ndaj futbollistëve të tij dhe për mënyrën e ndëshkimit me kartonë të verdhë.
“Nëse ua jep të verdhë atyre duhet të na e japësh edhe ne?”, iu drejtua trajneri kryesorit gjatë pjesës së parë.
Tensioni vazhdoi edhe pas përfundimit të 45 minutave të para, kur Daja hyri në fushë për t'i kërkuar shpjegime arbitrit. Protestat i kushtuan trajnerit të Dinamos një karton të verdhë.
Teuta siguron tri pikët, Dinamo nuk gjen përgjigje
Në pjesën e dytë, skuadra e Tetovës vijoi të mbështetej te organizimi mbrojtës dhe daljet në sulm. Dinamo kërkoi të ushtronte presion për të ndryshuar rezultatin, por nuk arriti të konkretizonte përpjekjet e saj.
Arifi realizoi golin e dytë për durrsakët, duke vulosur rezultatin 2-0 dhe duke i dhënë fund shpresave të kryeqytetasve për të marrë pikë nga kjo përballje.
Ndeshja u shoqërua me ndërhyrje të shumta dhe një total prej tetë kartonësh të verdhë, ndërsa tensionet në fushë pasqyruan rëndësinë e takimit për të dyja skuadrat.
Me këtë sukses, Teuta ngjitet në kuotën e 19 pikëve pas shtatë javësh, duke ruajtur vendin e parë në renditje. Egnatia ndodhet katër pikë pas durrsakëve, por ka zhvilluar një ndeshje më pak.
Daja pas humbjes: Na mungoi pasimi i fundit
Pavarësisht rezultatit, trajneri i Dinamos, Ilir Daja, nuk e konsideroi paraqitjen e skuadrës së tij negative. Në analizën pas takimit, ai theksoi se futbollistët kishin dhënë maksimumin, por nuk kishin arritur të finalizonin aksionet.
"Nuk ka asnjë shqetësim, janë gjëra që ndodhin. Sot nuk kemi bërë keq. Nëse e shikojmë ndeshjen nga fillimi deri në fund, na ka munguar pasimi i fundit. Ky është futbolli”.
“Prandaj thashë që nuk bëmë keq. Kur humbet, duhet të bësh një lloj analize. I thashë ekipit se kemi dhënë maksimumin”, deklaroi Daja.
Tekniku u ndal edhe te mungesat në përbërje, duke veçuar kapitenin Bruno Dita dhe ndikimin që ai ka në lojën e skuadrës.
“Kemi një kontingjent lojtarësh jashtë, si kapiteni Dita. Ai i jep më shumë qetësi dhe forcë lojës sonë në ajër. Nëse do të ishte Dita në lojë apo Sembene, mund të kishim luajtur në një formë tjetër - tha Daja, që më pas e hodhi fjalën edhe te arbitrimi -. Po të shikosh faullet, në raport me kundërshtarin, ata ishin shumë më tepër në dëmin tonë. Edhe ne u përgjigjëm, nuk qëndruam pasivë në fushë.”
Tetova pranon vështirësitë: Dinamo na mbylli në portë për 15 minuta
Në kampin fitues, Edlir Tetova u shpreh i kënaqur me rezultatin, por pranoi se Teuta nuk kishte zhvilluar ndeshjen e saj më të mirë. Trajneri vlerësoi edhe mënyrën se si Dinamo kishte tentuar të neutralizonte lojën e durrsakëve.
“Na kënaqin 3 pikët. Nuk luajtëm në mënyrën më të mirë, por ia dolëm të fitonim. E kemi pikën tonë të djathtë, por Dinamo i kishte marrë masat. Kalimi i Malës ishte i planifikuar. Ne manovrat i kishim djathtas, nuk kemi gjë për të fshehur”.
Tetova shpjegoi se ndryshimet taktike gjatë takimit kishin ndihmuar skuadrën të gjente hapësira, veçanërisht në aksionin e golit të parë.
“Forma e presingut të lojtarëve, me presing të lartë, e bëri të pamundur daljen në të djathtë. Pastaj, treguam me Malën në të majtë, pra ndërrimin e lojës. Funksionoi te goli i Pedros – tha tekniku, që thelloi konceptin -. Në pjesën e dytë, u bë funksionale linja e djathtë me inkursione, ku shënoi Toli. Kishim 15 minuta që Dinamo na ngjeshi në portë. Edhe ndërrimet ishin të cungura. Në pjesën e dytë nuk isha shumë i lumtur me bllokun e ulët, krahasuar me atë që kishim përgatitur ne.”
Fitorja ndaj Dinamos konfirmon nisjen pozitive të sezonit për Teutën, e cila ka marrë 19 nga 21 pikët e mundshme. Për skuadrën e Tetovës, objektivi i radhës është ruajtja e ritmit në krye të renditjes, ndërsa Dinamo duhet të kërkojë rikthimin te rezultatet pozitive pas këtij hapi fals.




