TË FUNDIT
Kthehu te lajmet
Kategoria Superiore

Dinamo udhëton pa kapitenin në Shkodër, Daja paralajmëron: “Mos u gënjeni nga renditja”

Dinamo City do të përballet më 11 tetor me Vllazninë, në ndeshjen e javës së gjashtë të “Abissnet Superiores”. Takimi në stadiumin “Loro Boriçi” nis në orën 18:30.

Dinamo udhëton pa kapitenin në Shkodër, Daja paralajmëron: “Mos u gënjeni nga renditja”

Dinamo City do të përballet më 11 tetor me Vllazninë, në ndeshjen e javës së gjashtë të “Abissnet Superiores”. Takimi në stadiumin “Loro Boriçi” nis në orën 18:30.

Në prag të transfertës, trajneri Ilir Daja ka vlerësuar kundërshtarin dhe ka kërkuar përqendrim maksimal nga lojtarët e tij. Dinamo do të luajë pa kapitenin Bruno Dita, ndërsa disa futbollistë të tjerë kanë pasur probleme fizike.

Pushimi me dy anë

Daja pranoi se ndërprerja e kampionatit erdhi në një moment të mirë për Dinamon, por skuadra kishte nevojë të rikuperonte energjitë pas ngarkesës së verës.

“Ndërprerja ka dy anë të medaljes. Ishim në një moment të mirë, kishim marrë rezultate pozitive dhe skuadra po luante mirë. Nga ana tjetër, kishim nevojë për të rikuperuar energjitë pas ngarkesës së madhe gjatë verës dhe ndeshjeve kualifikuese të Ligës së Konferencës”, deklaroi trajneri.

Gjatë pushimit, Daja nuk e ka pasur të gjithë grupin në dispozicion. Qefalija, Aliji dhe Berisha ishin të angazhuar me ekipet kombëtare, ndërsa lojtarë të tjerë janë përballur me dëmtime.

“Vllaznia nuk e meriton atë pozicion”

Trajneri i Dinamos nuk dëshiron që renditja aktuale e Vllaznisë të ndikojë në vlerësimin e ndeshjes. Sipas tij, shkodranët kanë zhvilluar paraqitje më të mira nga sa tregojnë rezultatet.

“Na pret një ndeshje e vështirë. Vllaznia nuk duhet gjykuar nga pozicioni aktual, sepse është një skuadër që nuk e meriton atë renditje. Ka zhvilluar ndeshje të mira dhe i kemi analizuar pothuajse të gjitha paraqitjet e saj”, u shpreh Daja.

Ai pret një përballje tërheqëse, por kërkon nga skuadra e tij të ruajë ekuilibrin dhe të luajë me pragmatizëm.

“Në Shkodër kemi zhvilluar gjithmonë ndeshje të bukura dhe me spektakël. Duhet të jemi maksimalisht të përqendruar dhe të japim 100 për qind, sepse është një transfertë e vështirë”, shtoi ai.

Dinamo pa Bruno Ditën

Mungesa kryesore e Dinamos do të jetë ajo e kapitenit Bruno Dita. Daja e pranoi peshën e tij në skuadër, por beson se grupi i zgjeruar do t’i mundësojë stafit të gjejë zgjidhjet e duhura.

“Kemi disa mungesa, por më e rëndësishmja është ajo e Bruno Ditës. E dimë vlerën e tij për skuadrën. Do të përpiqemi të gjejmë zgjidhjet më të mira me futbollistët që kemi, pasi këtë sezon grupi është më i gjerë”, përfundoi trajneri i Dinamos.