Shqipëria largohet pa pikë nga Helsinki, pasi u mund 2-1 nga Finlanda në ndeshjen e tretë të Ligës së Kombeve. Kuqezinjtë kaluan shpejt në avantazh, por kartoni i kuq i Etrit Berishës dhe dy golat e Walta-s nga goditjet e dënimit përmbysën gjithçka.
Skuadra e Rolando Maranit e nisi takimin në mënyrën më të mirë. Pas vetëm katër minutash lojë, Rey Manaj përfitoi nga zhvillimi i një goditjeje këndi dhe dërgoi topin në rrjetë. Ky ishte goli i 13-të i sulmuesit me fanellën e Kombëtares.
Kuqezinjtë kontrolluan lojën dhe nuk i lejuan hapësira Finlandës deri në minutën e 22-të, kur një gabim i Berishës ndryshoi rrjedhën e takimit.
Gabimi i Berishës dhe kartoni i kuq
Portieri kuqezi gaboi në pasim, duke ia dorëzuar topin kundërshtarit pranë zonës. Në përpjekje për të ndalur aksionin, Berisha shkaktoi faull dhe u ndëshkua me karton të kuq.
Maran largoi Arbër Hoxhën për t’i hapur vend Alen Sherrit. Portieri i Cagliarit u mposht menjëherë nga goditja e dënimit e Walta-s, pasi nuk arriti ta kontrollonte topin që i kaloi nga duart.
Finlanda barazoi në rastin e saj të parë të rrezikshëm, ndërsa Shqipëria u detyrua të luante pjesën e mbetur të ndeshjes me dhjetë futbollistë.
Walta ndëshkon sërish kuqezinjtë
Pavarësisht inferioritetit numerik, Shqipëria ruajti organizimin dhe nuk i lejoi vendasit të krijonin shumë raste. Në pjesën e dytë, Mirlind Daku udhëhoqi një kundërsulm të shpejtë dhe shërbeu për Stavro Pilon, por ky i fundit humbi hapin dhe nuk arriti të rrezikonte seriozisht portën finlandeze.
Kur kuqezinjtë po e menaxhonin mirë ndeshjen, Finlanda fitoi një tjetër goditje dënimi. Walta ekzekutoi sërish dhe e gjeti të papërgatitur Sherrin, duke realizuar golin e dytë personal dhe atë të fitores për vendasit.
Finlanda realizoi përmbysjen pa krijuar shumë nga loja e hapur, por shfrytëzoi maksimalisht gabimet e portierëve shqiptarë dhe situatat standarde.
Shqipëria humbet kreun e grupit
Me këtë fitore, Finlanda ngjitet në vendin e parë të Grupit C1 me shtatë pikë. Shqipëria zbret në vendin e dytë me gjashtë pikë dhe tashmë duhet të reagojë në ndeshjen e 6 tetorit ndaj San Marinos në “Air Albania”.
Gara për kreun pritet të vendoset përfundimisht në nëntor, kur kuqezinjtë do të presin Finlandën në Tiranë dhe më pas do të udhëtojnë për t’u përballur me Bjellorusinë.




