TË FUNDIT
Kthehu te lajmet
Kombëtare

Dy kuqezinj rrisin vlerën para Finlandës, Shqipëria mund ta sigurojë kreun brenda pak ditësh

Shqipëria është gati për ndeshjen më të rëndësishme të këtij grumbullimi. Pas përgatitjeve në Çezena, kuqezinjtë kanë mbërritur në Helsinki, ku të shtunën do të përballen me Finlandën në duelin direkt për kreun e Grupit C1 në Ligën e Kombeve.

Dy kuqezinj rrisin vlerën para Finlandës, Shqipëria mund ta sigurojë kreun brenda pak ditësh

Shqipëria është gati për ndeshjen më të rëndësishme të këtij grumbullimi. Pas përgatitjeve në Çezena, kuqezinjtë kanë mbërritur në Helsinki, ku të shtunën do të përballen me Finlandën në duelin direkt për kreun e Grupit C1 në Ligën e Kombeve.

Morali në skuadër është i lartë pas dy fitoreve të para. Shqipëria kryeson me gjashtë pikë, ndërsa Finlanda e ndjek me katër. Takimi do të zhvillohet më 3 tetor në stadiumin Olimpik të Helsinkit, duke nisur nga ora 15:00.

Shpendi dhe Pilo rrisin vlerën

Përpara ndeshjes kanë mbërritur lajme pozitive edhe për Cristian Shpendin dhe Stavro Pilon. Të dy futbollistët kanë regjistruar një rritje prej 500 mijë eurosh në përditësimin e fundit të vlerave të “Transfermarkt”.

Shpendi vlerësohet tashmë me 5 milionë euro, shifra më e lartë në skuadrën e Cesenas. Sulmuesi është shpërblyer për nisjen pozitive të sezonit dhe paraqitjet e tij në Serie B.

Edhe Pilo ka arritur vlerën më të lartë të karrierës. Mbrojtësi kuqezi vlerësohet me 2.5 milionë euro, pas rritjes së vazhdueshme dhe paraqitjeve të mira në muajt e fundit.

Vlerësimet e “Transfermarkt” janë shifra orientuese dhe nuk përfaqësojnë domosdoshmërisht çmimin që klubet do të kërkonin për kartonin e futbollistëve.

Skenari që i jep Shqipërisë vendin e parë

Dy ndeshjet e ardhshme mund ta shpallin Shqipërinë matematikisht fituese të grupit, pa qenë nevoja të presë sfidat e nëntorit.

Për ta siguruar kreun brenda këtij grumbullimi duhet të plotësohen tri kushte:

Shqipëria të fitojë ndaj Finlandës.

Shqipëria të mposhtë San Marinon më 6 tetor.

Bjellorusi-Finlandë të përfundojë në barazim.

Me këtë kombinim, kuqezinjtë do të arrinin në kuotën e 12 pikëve. Finlanda do të mbetej me pesë pikë dhe Bjellorusia me dy. Edhe nëse do t’i fitonin dy ndeshjet e fundit, asnjëra nuk mund ta kapte Shqipërinë në krye.

Fitorja e grupit do të sillte ngjitjen direkte në Ligën B. Ajo do t’i siguronte Shqipërisë edhe një rrugë rezervë drejt “play-off”-it të EURO 2028, nëse kuqezinjtë nuk kualifikohen nga grupi eliminator. Sipas formatit të miratuar nga UEFA, në “play-off” përfshihen skuadrat e dyta që mbeten jashtë kualifikimit dhe fitueset më të mira të grupeve të Ligës së Kombeve që nuk janë kualifikuar drejtpërdrejt.

Luis Hasa mungon në Helsinki

Mungesa e vetme në grup është Luis Hasa. Mesfushori nuk udhëtoi drejt Finlandës për shkak të temperaturës së lartë dhe u kthye në Tiranë.

FSHF njoftoi se Hasa është rikuperuar dhe ka nisur një program të personalizuar në Klinikën e Kombëtares. Ai pritet të jetë në dispozicion për takimin me San Marinon, më 6 tetor në “Air Albania”.

Pjesa tjetër e lojtarëve është stërvitur normalisht. Maran ka punuar në aspektin fizik dhe taktik, duke testuar edhe zgjidhjet që mund të përdorë ndaj një Finlande të organizuar dhe të vështirë për t’u përballuar.

Një fitore në Helsinki do ta çonte Shqipërinë pesë pikë mbi rivalin kryesor dhe do ta vendoste shumë pranë realizimit të objektivit të parë të epokës së Rolando Maranit.