Egnatia ka marrë një fitore të rëndësishme në transfertë, duke mposhtur 2-0 Laçin në javën e gjashtë të “Abissnet Superiores”. Kampionët e Shqipërisë e zgjidhën ndeshjen në minutat e fundit me golat e Loukilit dhe Diabates.
Pjesa e parë u mbyll pa gola, ndërsa Laçi iu afrua avantazhit menjëherë pas pushimit. Nërguti goditi shtyllën në minutën e 47-të, duke humbur një mundësi të mirë për vendasit.
Kurbinasit u ndalën sërish nga shtylla me Bibon, pas një devijimi të Sotës. Rastet e humbura rezultuan vendimtare, pasi Egnatia u tregua më e saktë në fundin e takimit.
Penallti e përsëritur, Loukili nuk gabon
Në minutën e 72-të, Egnatia fitoi një penallti pas ndërhyrjes ndaj Grudës. Portieri Guri e ndali fillimisht gjuajtjen e Loukilit, por 11-metërshi u urdhërua të përsëritej.
Në tentativën e dytë, sulmuesi u tregua i saktë dhe kaloi rrogozhinasit në avantazh në minutën e 80-të.
Nëntë minuta më vonë, Gruda shërbeu Diabaten, i cili realizoi golin e dytë dhe mbylli ndeshjen. Sulmuesi pati edhe një mundësi tjetër në shtesë, por goditja e tij përfundoi jashtë.
Egnatia mori tri pikët falë efikasitetit në momentet vendimtare, ndërsa Laçi mbeti me keqardhjen e dy shtyllave dhe rasteve të pashfrytëzuara.
Abissnet Superiore, java 6
Laçi 0-2 Egnatia
Golat: Loukili 80’ (p), Diabate 89’




