TË FUNDIT
Kthehu te lajmet
Kosovë

“Është fenomen, më i forti i Juventusit”, legjenda bardhezi mahnitet nga Zhegrova

Juventusi do të rikthehet pas pushimit të kombëtareve me një ndeshje të rëndësishme ndaj Cagliarit.

“Është fenomen, më i forti i Juventusit”, legjenda bardhezi mahnitet nga Zhegrova

Juventusi do të rikthehet pas pushimit të kombëtareve me një ndeshje të rëndësishme ndaj Cagliarit. Bardhezinjtë kërkojnë një reagim të fortë, ndërsa Fabrizio Ravanelli beson se Edon Zhegrova mund të jetë lojtari vendimtar.

Ish-sulmuesi i Juventusit foli gjatë formatit “Penna Bianca” në kanalin e “Tuttosport” në YouTube, ku analizoi skuadrën e Luciano Spallettit dhe vlerësoi lart cilësitë e anësorit të Kosovës.

“Nëse gjen vazhdimësi, është më i forti”

Ravanelli zbuloi se kishte biseduar drejtpërdrejt me Zhegrovën. Sipas tij, 27-vjeçari duhet të shfaqë në ndeshjet e Juventusit të njëjtin nivel që tregon në stërvitje dhe me Kosovën.

“Fola dje me të dhe i thashë se është një fenomen. Atë që bën në stërvitje dhe me Kosovën duhet ta bëjë edhe në ndeshjet e Juventusit. Nëse gjen vazhdimësi, është lojtari më i fortë që ka Juventusi. Është në gjendje t’i vendosë ndeshjet”, deklaroi Ravanelli.

Ish-sulmuesi mendon se Zhegrova ka potencialin për të arritur shifra të rëndësishme, jo vetëm si realizues, por edhe në krijimin e rasteve për shokët.

“Për mua mund të shënojë 10 gola, por është vendimtar sidomos me pasimin e fundit. Kur arrin në 20 metrat e fundit, bëhet shkatërrues dhe e lexon mirë aksionin. U gjykua kur nuk ishte në formën e duhur. Tani është mirë, bën diferencën dhe shpresoj ta tregojë edhe ndaj Cagliarit”, shtoi ai.

Ravanelli kërkon sinjal të fortë nga Juventusi

Rikthimi pas pushimit të kombëtareve mund të jetë i ndërlikuar, pasi Spalletti nuk e ka pasur të gjithë grupin në dispozicion gjatë përgatitjeve.

“Nuk është e lehtë, sepse trajneri nuk e ka pasur skuadrën të plotë. Do të nevojitet një qasje e fortë mendore dhe profesionalizëm nga lojtarët. Spalletti do t’i testojë edhe në aspektin e motivimit dhe në këtë pikë ka cilësi të lindura”, shpjegoi Ravanelli.

Sipas tij, ndeshja me Cagliarin mund të tregojë nivelin e pjekurisë së Juventusit dhe ambiciet e skuadrës për vazhdimin e sezonit.

“Juventusi duhet të rikuperojë pozicione. Mund të zhvillojë një sezon të madh dhe në ndeshje të tilla shihet shpirti i skuadrës. Një fitore dhe një paraqitje bindëse do të jepnin një mesazh të rëndësishëm”, përfundoi Ravanelli.