TË FUNDIT
Kthehu te lajmet
Diaspora

Etrit Berisha në superformë, Haken i thur elozhe

Etrit Berisha po kalon një periudhë mjaft pozitive në kampionatin suedez.

Etrit Berisha në superformë, Haken i thur elozhe

Etrit Berisha po kalon një periudhë mjaft pozitive në kampionatin suedez. Portieri shqiptar është kthyer në një nga lojtarët më të rëndësishëm të Hakenit, duke ndihmuar skuadrën të mbetet në garë për një vend në kompeticionet europiane.

37-vjeçari ka regjistruar statistika mbresëlënëse që prej rikthimit gjatë verës, ndërsa klubi suedez ka zgjedhur t'i kushtojë një postim të veçantë në rrjetet sociale.

Gjashtë ndeshje pa pësuar gol për Berishën

Në shtatë paraqitjet e fundit me Hakenin, Berisha e ka mbajtur portën të paprekur në gjashtë raste. Për më tepër, portieri shqiptar ka arritur në 389 minuta radhazi pa pësuar gol në kampionatin suedez.

Klubi ka vlerësuar publikisht paraqitjet e tij, duke evidentuar ecurinë pozitive që prej rikthimit në skuadër.

“6 zero në 7 ndeshje për Etrit Berishën. Që nga kthimi i tij këtë verë, futbollisti 37-vjeçar ka mbajtur 6 zero në 7 ndeshje për Haken dhe pas ditës së djeshme, ka arritur në 389 minuta radhazi pa pësuar gol në kampionatin suedez”, thuhej në postimin e klubit.

Berisha nuk ka pësuar gol prej më shumë se një muaji në kampionat, duke konfirmuar formën e mirë dhe rëndësinë e tij për repartin mbrojtës të skuadrës suedeze.

Rekordi historik ende larg

Pavarësisht statistikave pozitive, Berisha ka ende një distancë të konsiderueshme për të arritur rekordin e kampionatit suedez për minutat radhazi pa pësuar gol.

Ky rekord mbahet nga Hakan Svensson, ish-portieri i Halmstads, i cili regjistroi 808 minuta pa pësuar gol gjatë viteve 1999-2000.

Për të barazuar këtë shifër, Berishës i duhen edhe 419 minuta të tjera pa pësuar gol.

Ndërkohë, objektivi kryesor mbetet vazhdimësia e paraqitjeve pozitive, teksa Haken synon të sigurojë një pozicion që i mundëson pjesëmarrjen në arenën europiane.