TË FUNDIT
Kthehu te lajmet
Kombëtare

Fitorja nuk bind askënd, lojtarët kuqezi pranojnë problemet ndaj San Marinos

Shqipëria fitoi 2-1 ndaj San Marinos, por rezultati nuk mjaftoi për të zbutur zhgënjimin për paraqitjen e kuqezinjve.

Fitorja nuk bind askënd, lojtarët kuqezi pranojnë problemet ndaj San Marinos

Shqipëria fitoi 2-1 ndaj San Marinos, por rezultati nuk mjaftoi për të zbutur zhgënjimin për paraqitjen e kuqezinjve. Skuadra e Rolando Maranit krijoi raste të shumta për ta mbyllur ndeshjen që në pjesën e parë, por mungesa e konkretizimit dhe rënia e përqendrimit e kthyen sfidën në një vuajtje të papritur.

San Marino barazoi në pjesën e dytë dhe e vendosi Shqipërinë nën presion, përpara se Kristjan Asllani të realizonte nga penalltia golin e fitores në minutat shtesë.

Pas ndeshjes, Mirlind Daku, Asllani, Elseid Hysaj dhe Berat Gjimshiti nuk kërkuan justifikime. Të katër pranuan se skuadra gaboi në përqendrim, humbi shumë topa dhe shpërdoroi mundësi të mjaftueshme për ta zgjidhur takimin shumë më herët.

Daku: Do të ishte katastrofë po të mos fitonim

Mirlind Daku kërkoi që skuadra të mos nënvlerësojë asnjë kundërshtar, pavarësisht diferencave në renditje apo cilësi.

“Nuk duhet nënvlerësuar asnjë kombëtare, sepse të gjithë luajnë futboll. Duhet të përqendrohemi maksimalisht ndaj këtyre skuadrave. Do të ishte turp të linim pikë”, deklaroi sulmuesi për TV Klan.

Daku shpjegoi edhe arsyen pse mori topin përpara penalltisë së Asllanit. Sipas tij, synimi ishte të largonte presionin nga mesfushori dhe të pengonte kundërshtarët që ta shpërqendronin.

“Isha plotësisht i bindur se Asllani do të shënonte. Për fat fituam, sepse do të ishte katastrofë nëse nuk do t’ia dilnim”, shtoi ai.

Asllani: Kur nuk e mbyll ndeshjen, lindin problemet

Autori i dy golave të Shqipërisë pranoi se skuadra nuk arriti të ruante ritmin dhe të ushtronte presingun e nevojshëm.

“Nuk e di pse u bë kaq e vështirë. Kur nuk i mbyll ndeshjet, krijohet një problem i madh. Ndoshta ne mesfushorët nuk ushtruam presingun e duhur dhe kishim distanca të mëdha”, tha Asllani.

Mesfushori u ndal edhe te penalltia vendimtare, duke treguar se vëzhgon gjithmonë lëvizjen e portierit përpara goditjes. Ai pranoi se kuqezinjtë tashmë po i kuptojnë më mirë idetë e trajnerit Maran, por duhet t’i zbatojnë ato me më shumë vazhdimësi.

Hysaj: Kjo ndeshje duhet të na shërbejë si mësim

Elseid Hysaj e lidhi vuajtjen e Shqipërisë me rastet e humbura. Sipas mbrojtësit, ndeshja mund të ishte mbyllur që në pjesën e parë.

“Kur nuk i shënon mundësitë që krijon, gjithçka vështirësohet. Mund të kishim shkuar në pushim me rezultatin 3-0. Kur e lë ndeshjen 1-0, kundërshtari mund të krijojë një rast dhe të të ndëshkojë”, deklaroi Hysaj.

Ai pranoi se lodhja nga katër ndeshjet brenda pak ditësh ndikoi te disa lojtarë, por nuk e përdori atë si justifikim. Hysaj kërkoi përqendrim maksimal në sfidat vendimtare të nëntorit.

“Nuk mund t’i gabojmë këto ndeshje, sepse penalizohet i gjithë grupi. Duhet ta marrim si mësim. Nëse nuk jemi të përqendruar 100%, nuk mund të arrijmë asgjë”, theksoi mbrojtësi.

Për golin e San Marinos, Hysaj pranoi se skuadra u tregua neglizhente dhe u vendos me vonesë, duke i lënë kundërshtarit hapësirën për të luajtur pa presion.

Gjimshiti: Nuk kam fjalë, luajtëm shumë dobët

Kritikat më të forta erdhën nga kapiteni Berat Gjimshiti. Mbrojtësi e cilësoi paraqitjen një nga më të vështirat e karrierës së tij dhe kërkoi që skuadra të vendosë suksesin kolektiv përpara atij individual.

“Duhet të luajmë si skuadër. Kur funksionon ekipi, vjen edhe suksesi individual. Në fillim bëmë mirë, por më pas secili dukej sikur kërkonte të shënonte vetë. Duhet të luajmë së bashku”, tha Gjimshiti.

Kapiteni evidentoi mungesën e përqendrimit, topat e humbur dhe agresivitetin më të madh të San Marinos.

“Nuk kam fjalë për paraqitjen tonë. Nëse nuk punojmë mjaftueshëm me këmbët, duhet të punojmë me kokën. Mentaliteti është kryesor”, përfundoi Gjimshiti.

Shqipëria mori tri pikët, por reagimet e lojtarëve treguan qartë se brenda skuadrës askush nuk e konsideroi të pranueshme mënyrën se si erdhi kjo fitore.