Dinamo po përgatitet të rikthejë zyrtarisht emrin e saj historik. Klubi kryeqytetas ka nisur procedurat për ndryshimin e emërtimit nga Dinamo City në Dinamo Tirana, një proces që pritet të përfundojë brenda muajit janar.
Pas ndryshimit të logos, drejtuesit po punojnë për të përmbyllur edhe hapat administrativë që do t'i japin fund periudhës së Dinamo City-t.
Ky vendim shënon një kthesë në projektin e klubit blu, i cili synon të rikthejë lidhjen me identitetin tradicional dhe historinë e tij në futbollin shqiptar.
Nga Dinamo City te Dinamo Tirana, ndryshon edhe stema
Hapi i parë drejt rikthimit të emrit historik është bërë përmes ndryshimit të logos.
Në stemën e mëparshme, shkronja karakteristike “D” shoqërohej nga valët e detit dhe mbishkrimi “Dinamo City 1950”.
Në versionin e ri, valët janë zëvendësuar me Kullën e Sahatit, një nga simbolet më të njohura të Tiranës, ndërsa emërtimi është ndryshuar në “Dinamo Tirana 1950”.
Ndryshimi synon të forcojë lidhjen e klubit me kryeqytetin dhe të rikthejë elemente të identitetit që e kanë shoqëruar ndër vite.
Për tifozët dinamovitë, rikthimi i emrit historik ka qenë një kërkesë e vazhdueshme që prej kalimit te emërtimi Dinamo City.
Nisin procedurat, janari afati për ndryshimin zyrtar
Megjithëse logoja e re është prezantuar, ndryshimi i emrit nuk është përfunduar ende në aspektin administrativ.
Sipas informacioneve të raportuara, klubi ka nisur procedurat dhe njoftimet pranë institucioneve përkatëse për regjistrimin e emërtimit të ri.
Procesi përfshin Federatën Shqiptare të Futbollit, UEFA-n, FIFA-n dhe Qendrën Kombëtare të Biznesit, ku duhet të pasqyrohet edhe ndryshimi i emrit të subjektit.
Pritshmëritë janë që procedurat të përfundojnë brenda muajve të ardhshëm, me janarin si afatin maksimal të parashikuar.
Deri në përmbylljen e tyre, Dinamo City mbetet emërtimi që duhet të zëvendësohet në dokumentacionin zyrtar.
Mbyllet projekti Dinamo City
Rikthimi te emri Dinamo Tirana shënon edhe largimin nga identiteti i krijuar gjatë periudhës së projektit Dinamo City.
Ky projekt ishte shoqëruar me një koncept të ri për klubin dhe me një identitet vizual që sillte ndër mend modelin e Manchester Cityt.
Tashmë, drejtuesit kanë zgjedhur një tjetër drejtim, duke i dhënë përparësi historisë dhe lidhjes së skuadrës me Tiranën.
Ndryshimi nuk pritet të kufizohet vetëm te stema, por të pasqyrohet edhe në emërtimin zyrtar të klubit në kompeticionet ku merr pjesë.
Për Dinamon, ky është një rikthim te rrënjët. Për tifozët, një hap i rëndësishëm drejt rikthimit të identitetit me të cilin klubi ka shkruar historinë e tij.




