Berat Gjimshiti ka treguar se mes lojtarëve të Kombëtares dhe trajnerit të ri, Rolando Maran, është krijuar një marrëdhënie e afërt. Kapiteni kuqezi ka zhvilluar disa biseda me teknikun italian për sistemin e lojës dhe mënyrën se si skuadra duhet të paraqitet.
“Gjatë këtyre viteve kam punuar me disa trajnerë dhe kam provuar taktika të ndryshme. Kohët e fundit kam folur shumë me Maranin për aspektin taktik dhe çështje të tjera. Besoj se do të zgjedhë zgjidhjen më të mirë për ekipin, në mënyrë që të përshtaten të gjithë lojtarët dhe të hapet rruga drejt suksesit”, deklaroi Gjimshiti.
Mbrojtësi është gati për sfidën kundër Bjellorusisë, që do të luhet të shtunën në orën 20:45. Ai tregoi se lojtarët kanë bërë edhe një premtim mes tyre përpara nisjes së edicionit të ri të Ligës së Kombeve.
“Do të qëndrojmë së bashku në fitore dhe humbje”
Gjimshiti theksoi se objektivi kryesor i Shqipërisë është fitimi i grupit. Në perspektivë, kuqezinjtë synojnë pjesëmarrjen e tretë në një Kampionat Europian.
“Premtimi ynë është se do të japim maksimumin. Do të qëndrojmë të gjithë së bashku, si në fitore ashtu edhe në humbje. Duam vendin e parë dhe mundësinë për t’u kualifikuar për herë të tretë në Europian. Ky është synimi ynë dhe kjo është rruga e duhur”, tha kapiteni.
Ai pranoi se Shqipëria nuk është skuadra e vetme që synon kreun e grupit. Sipas Gjimshitit, të gjitha përfaqësueset do të hyjnë në garë me pretendime.
“Ka presion, sepse të gjitha ekipet duan vendin e parë. Edhe unë gjithmonë kërkoj maksimumin. Nuk patëm fat ndaj Polonisë në rrugën drejt Botërorit, që do të kishte qenë një arritje e madhe. Tani do të përpiqemi të përsërisim kualifikimin në Europian. Pse jo, për herë të tretë”, shtoi ai.
**Batuta për Asllanin dhe kampionatin saudit
**
Në fund, Gjimshiti foli edhe për largimin nga futbolli italian dhe kalimin në Arabinë Saudite. Ai bëri shaka se ndoshta i kishte hapur rrugën Kristjan Asllanit, por kërkoi që niveli i kampionatit saudit të mos nënvlerësohet.
“Ndoshta ia kam hapur unë rrugën Asllanit”, tha fillimisht kapiteni duke qeshur.
“Kalimi ishte vendimi im, i marrë së bashku me Atalantën në atë periudhë. Nga jashtë është e vështirë të kuptohet niveli i kampionatit, sepse nuk transmetohet nga të gjitha televizionet. Është një ligë shumë e vështirë dhe ka shumë lojtarë cilësorë që kanë ardhur nga Europa gjatë tri ose katër viteve të fundit.”
Sipas Gjimshitit, kampionati është veçanërisht kërkues për mbrojtësit.
“Nuk është aq e thjeshtë sa duket. Pothuajse çdo skuadër ka në sulm një futbollist të njohur. Për mua, si mbrojtës, kjo përbën një sfidë të madhe”, përfundoi kapiteni i Shqipërisë.




