TË FUNDIT
Kthehu te lajmet
Kategoria Superiore

Glen Daja prezantohet te Elbasani, zbulon këshillën e babait dhe objektivin ndaj Teutës

Glen Daja ka nisur zyrtarisht aventurën e tij si trajner i Elbasanit, duke marrë drejtimin e skuadrës verdheblu pas dorëheqjes së Ivan Gvozdenoviç.

Glen Daja prezantohet te Elbasani, zbulon këshillën e babait dhe objektivin ndaj Teutës

Glen Daja ka nisur zyrtarisht aventurën e tij si trajner i Elbasanit, duke marrë drejtimin e skuadrës verdheblu pas dorëheqjes së Ivan Gvozdenoviç. Në daljen e parë përpara mediave, tekniku i ri ka folur për vendimin që e çoi në këtë pankinë, këshillën e marrë nga babai i tij, Ilir Daja, si dhe pritshmëritë për pjesën e mbetur të sezonit.

Daja pranoi se e merr drejtimin e Elbasanit në një moment delikat, por u shpreh i bindur se skuadra ka cilësitë e nevojshme për të ndryshuar situatën.

Daja: Elbasanit nuk mund t'i thuash jo

Trajneri i ri falënderoi drejtuesit e klubit për besimin, ndërsa theksoi se oferta erdhi në momentin kur ndihej i përgatitur për të ndërmarrë hapin e radhës në karrierë.

“Dua të falënderoj presidentin dhe drejtorin e klubit të Elbasanit, të cilët ishin iniciatorët që të jem trajner këtu. Elbasani është klub i madh në Shqipëri dhe nuk mund t’i thuash kurrë jo. Një ftesë që erdhi në momentin tim më të mirë, pasi kisha marrë të gjithë kapacitetin e duhur për të bërë një hap të tillë.”

Megjithatë, Daja nuk dëshiron të bëjë premtime përpara se skuadra të tregojë rezultatet në fushë.

“Këtë do e them pas njëfarë kohe dhe të kemi arritur diçka. Çdo gjë e tregon fusha. Në momentin që nuk ke rezultate, nuk ke arritur asgjë. Të jesh trajneri i Elbasanit, përgjegjësi shumë e madhe. Presion i madh në këtë moment, sepse ekipi nuk është në moment të mirë. Por futbolli prandaj është i bukur, sepse duhet të përballosh edhe presionin.”

Kujtimet e vitit 2006 dhe këshilla e Ilir Dajës

Emërimi në Elbasan ka edhe një domethënie personale për trajnerin e ri. Babai i tij, Ilir Daja, fitoi titullin kampion me verdheblutë në vitin 2006, një sukses që Gleni e kujton ende.

“Nga Elbasani kam vetëm kujtime të bukura. Në vitin 2006, unë vërtet kam qenë i vogël, ama kam qenë pjesë e asaj feste madhështore. Kujtim i paharrueshëm. Mbaj mend që në atë periudhë, shikoja edhe ndonjë ndeshje të Elbasanit kur luante jashtë. Ishalla përsëritet prapë historia. Edhe për babin tim, Elbasani ishte klub i parë, kështu është edhe për mua si trajner.”

Daja zbuloi gjithashtu se kishte marrë oferta të tjera, por kishte zgjedhur të priste mundësinë e duhur.

“Të them të drejtën, më kanë ardhur shumë oferta. Edhe nga Shqipëria, por edhe nga vendet e tjera. Kam refuzuar, sepse nuk më ka pëlqyer kualiteti i ekipeve dhe momenti jo i duhur.”

Vendimi për t'u larguar nga bashkëpunimi me të atin nuk ishte i lehtë, por këshilla e Ilir Dajës rezultoi vendimtare.

“Në momentin që erdhi oferta e Elbasanit, këshilla e babit ishte: ‘Tani vendos vetë, sepse nuk mund t’i thuash jo një klubi si Elbasani’. Pavarësisht se dëshira e tij ishte të mbeteshim bashkë dhe të ndihmonim njëri-tjetrin.”

Babë e bir rivalë në Superiore: Le të fitojë më i miri

Me marrjen e drejtimit të Elbasanit, Glen Daja do të ketë mundësinë të përballet si kundërshtar me Ilir Dajën, me të cilin ka punuar për disa vite.

“Rivaliteti me Ilir Dajën si trajner? Një ditë do të ndodhte. Ndodhi tani, mund të ndodhte pas 2 vjetësh. Objektivi im ishte që të punoja bashkë me tim atë deri në njëfarë pike dhe pastaj do të shkëputesha kur të vinte momenti. Jemi përgatitur për këtë pjesë. Ne jemi të dy profesionistë. Le të fitojë më i miri.”

Besim te skuadra, objektivi i parë janë tri pikët ndaj Teutës

Trajneri i ri tregoi se e ka ndjekur nga afër ecurinë e Elbasanit dhe se problemet e skuadrës nuk lidhen domosdoshmërisht me mungesën e cilësisë.

“Të them të drejtën, i kam parë të gjitha ndeshjet që ka bërë Elbasani këtë sezon, ka bërë mirë. Gabimi ka pasur të bëjë me episodet ose zgjidhjet e situatave.”

“Ky grup ka goxha cilësi, përndryshe as unë nuk do e merrja përsipër një punë të tillë. Besoj se do i nxjerrim më të mirën. Futbolli nuk është matematikë, ndonjëherë i paparashikueshëm.”

Sfida e parë e Glen Dajës në pankinën verdheblu do të jetë transferta ndaj Teutës, skuadër që kryeson renditjen e kampionatit.

Pavarësisht vështirësisë së takimit, tekniku e bëri të qartë se Elbasani do të udhëtojë drejt Durrësit vetëm për fitore.

“Transferta me Teutën? Durrësi është një ekip me meritë në vendin e parë. Ka një kontingjent të fortë. Neve na duhen pikët, më shumë do të respektojmë veten tonë sesa të tjerët. Nuk më intereson kundërshtari që kemi përballë, por interesat tona. Ne do të futemi vetëm për 3 pikët ndaj Teutës.”