TË FUNDIT
Kthehu te lajmet
Kombëtare

Goditje nga FIFA për Tiranën dhe Dinamon, klubet humbin gjyqet me ish-lojtarët

Tirana dhe Dinamo kanë humbur dy çështje në Tribunalin e Futbollit të FIFA-s për detyrime financiare ndaj ish-futbollistëve.

Goditje nga FIFA për Tiranën dhe Dinamon, klubet humbin gjyqet me ish-lojtarët

Tirana dhe Dinamo kanë humbur dy çështje në Tribunalin e Futbollit të FIFA-s për detyrime financiare ndaj ish-futbollistëve. Vendimet i ngarkojnë klubet kryeqytetase me pagesën e pagave të prapambetura, dëmshpërblimeve, interesave dhe, në rastin e bardhebluve, edhe të një gjobe.

Dinamo duhet të dëmshpërblejë Jordy Ella

Në çështjen me numër 18817, FIFA ka vendosur në favor të ish-futbollistit të Dinamos, Jordy Andre Ella. Lojtari nga Gaboni e ndërpreu në mënyrë të njëanshme kontratën më 28 mars 2025, duke pretenduar se klubi nuk kishte respektuar detyrimet financiare.

Gjatë procesit, Ella ngriti dyshime se disa nënshkrime në mandat-pagesat e paraqitura nga Dinamo nuk ishin të tijat. FIFA sqaroi se nuk kishte kompetencë për të përcaktuar përgjegjësi penale mbi këtë pretendim dhe e kufizoi shqyrtimin te mosmarrëveshja kontraktuale.

Sipas vendimit, Dinamo nuk paraqiti dokumentacion të mjaftueshëm kontabël për të vërtetuar pagesat. Për këtë arsye, u rrëzua edhe kundërpadia e klubit, i cili pretendonte se futbollisti kishte braktisur skuadrën.

Dinamo duhet t’i paguajë Ellas 2,600 euro paga të prapambetura, së bashku me interesin vjetor prej 5%. Klubi duhet të shlyejë edhe 2,100 euro si dëmshpërblim për prishjen e kontratës.

Tirana, shkelja e tretë brenda dy viteve

Më e rëndë paraqitet situata e Tiranës në çështjen 23813. FIFA ka vendosur në favor të ish-futbollistit spanjoll Víctor Fernández, pasi klubi nuk respektoi marrëveshjen për zgjidhjen e kontratës.

Palët kishin nënshkruar marrëveshjen më 30 dhjetor 2025. Në dokument, Tirana pranonte një detyrim prej 31,500 eurosh neto, i cili duhej të shlyhej brenda 15 shkurtit 2026.

Pagesa nuk u krye brenda afatit. Fernández kërkoi më pas shlyerjen e detyrimit, por çështja nuk u zgjidh mes palëve.

FIFA ka urdhëruar Tiranën t’i paguajë lojtarit shumën prej 31,500 eurosh neto, së bashku me interesin vjetor prej 10%, që llogaritet nga 16 shkurti 2026 deri në ditën e pagesës.

Rasti është klasifikuar si shkelja e tretë e klubit brenda dy viteve për vonesa në pagesa. Për këtë arsye, Tirana është dënuar edhe me një gjobë prej 5,000 dollarësh.