Partizani ka zyrtarizuar afrimin e Sebastjan Spahiut vetëm një ditë përpara derbit me Tiranën. Mesfushori ofensiv i është bashkuar të kuqve si lojtar i lirë dhe ka firmosur një kontratë dyvjeçare, me mundësi rinovimi edhe për një sezon tjetër.
26-vjeçari vjen pas eksperiencës me Shkëndijën e Tetovës, ku ishte pjesë e skuadrës edhe gjatë fazës së ligës në Ligën e Konferencës.
“FK Partizani ka kënaqësinë të zyrtarizojë arritjen e marrëveshjes me mesfushorin ofensiv Sebastjan Spahiu. Mesfushori shkodran ka firmosur një kontratë dyvjeçare, me opsion rinovimi për një sezon tjetër”, njoftoi klubi.
Partizani bëri të ditur se në realizimin e transferimit ka kontribuar edhe ish-sulmuesi i të kuqve, Xhevahir Sukaj. Spahiu është prezantuar nga presidenti Gazment Demi.
Mesfushori ka luajtur më parë në Spanjë me CD Guijuelo dhe CD Izarra, ndërsa në kampionatin shqiptar ka përfaqësuar Laçin dhe Egnatian.
Spahiu numëron edhe një paraqitje me Kombëtaren shqiptare. Ai debutoi më 10 shtator 2024 kundër Gjeorgjisë, gjatë periudhës kur kuqezinjtë drejtoheshin nga Sylvinho.
Afrimi i tij zyrtarizohet në prag të ndeshjes Partizani-Tirana, e vlefshme për javën e gjashtë të “Abissnet Superiores”.




