Një atmosferë e zjarrtë pritet sot në stadiumin Olimpik të Helsinkit, ku Finlanda dhe Shqipëria do të përballen duke nisur nga ora 15:00. Mijëra tifozë shqiptarë kanë udhëtuar për të mbështetur kuqezinjtë në duelin direkt për kreun e Grupit C1.
Sipas të dhënave zyrtare të Federatës Finlandeze të Futbollit, janë shitur mbi 22 mijë bileta. Shifra mund të rritet më tej deri në nisjen e ndeshjes.
Një nga ndeshjet më të ndjekura të vitit
Stadiumi Olimpik ka rreth 36.200 vende, ndaj mbi gjysma e kapacitetit është plotësuar që përpara ditës së ndeshjes.
Interesi është nxitur edhe nga rëndësia e përballjes. Shqipëria kryeson grupin me gjashtë pikë, ndërsa Finlanda e ndjek me katër. Një fitore do t’i jepte skuadrës së Rolando Maranit një avantazh prej pesë pikësh ndaj rivalit kryesor.
Prania e madhe e komunitetit shqiptar në Finlandë dhe në vendet e tjera nordike pritet t’i japë ndeshjes një atmosferë të veçantë. Sektori kuqezi do të jetë një nga më të zëshmit në stadium.
Holanda dhe Anglia mbajnë shifrat më të larta
Ndeshja e Finlandës kundër Holandës, e zhvilluar në qershor 2025, tërhoqi 29.483 spektatorë.
Një numër edhe më i madh u regjistrua në tetor 2024, kur 32.411 tifozë ndoqën nga stadiumi humbjen 3-1 të Finlandës ndaj Anglisë.
Shqipëria nuk ka emrin ndërkombëtar të këtyre dy kundërshtarëve, por interesi për ndeshjen e sotme tregon peshën e sfidës dhe forcën e mbështetjes kuqezi.
Tifozët shqiptarë janë grumbulluar në Helsinki që prej paradites dhe do të marshojnë së bashku drejt stadiumit. Në fushë luhet për vendin e parë, ndërsa në tribuna pritet një duel i fortë mes dy tifozerive.




