Partizani dhe Florin Bratu kanë përfunduar bashkëpunimin. Drejtuesit e kuq kanë vendosur ta largojnë trajnerin rumun pas humbjes 3-1 në derbin me Tiranën.
Rezultatet e gjashtë javëve të para ishin shumë larg pritshmërive. Partizani grumbulloi vetëm katër pikë dhe zbriti në vendin e parafundit të “Abissnet Superiores”.
Edhe bilanci mbrojtës rëndoi mbi Bratun. Të kuqtë pësuan 13 gola, më shumë se çdo skuadër tjetër në kampionat.
Vetëm një fitore në gjashtë ndeshje
Bratu u emërua në korrik, por aventura e tij në kryeqytet zgjati vetëm gjashtë javë kampionati. Partizani regjistroi një fitore, një barazim dhe katër humbje.
Debutimi ndaj Teutës u mbyll në barazim, ndërsa suksesi i vetëm erdhi në transfertë kundër Vllaznisë. Të kuqtë u mposhtën nga Laçi, Dinamo City, Egnatia dhe Tirana.
Humbja në derbi rezultoi vendimtare për të ardhmen e rumunit. Pas ndeshjes, Bratu kishte pranuar se katër pikë ishin shumë pak dhe kishte paralajmëruar një takim me drejtuesit për të diskutuar situatën.
Derbi vazhdon kështu të jetë fatal për trajnerët e Partizanit. Edhe sezonin e kaluar, Mladen Milinkoviç dhe Oltijon Kërnaja u larguan pas humbjeve ndaj Tiranës.
Tre emra për drejtimin e përkohshëm
Alfred Deliallisi është kandidati i parë për të drejtuar përkohësisht stërvitjen e ekipit të parë. Ai punon aktualisht si trajner i Partizanit B dhe e njeh mirë ambientin e kuq.
Një tjetër mundësi është Genc Tomori, i cili mban postin e drejtorit të akademisë dhe ka vite që punon brenda klubit.
Në diskutim mbetet edhe Fatjon Muhameti. Trajneri drejton ekipin U-19 në UEFA Youth League dhe sezonin e kaluar e shpalli këtë grupmoshë kampione.
Drejtuesit duhet të marrin shpejt një vendim, pasi Partizani do të luajë në transfertë ndaj Vorës në javën e shtatë të kampionatit.




