TË FUNDIT
Kthehu te lajmet
Kategoria Superiore

Ilir Daja dënohet rëndë, ja kur rikthehet në stolin e Dinamos

Ilir Daja do të mungojë në tri ndeshjet e ardhshme të Dinamos.

Ilir Daja dënohet rëndë, ja kur rikthehet në stolin e Dinamos

Ilir Daja do të mungojë në tri ndeshjet e ardhshme të Dinamos, pas pezullimit me pesë takime nga Komisioni i Disiplinës. Trajneri i bluve pritet të rikthehet në stol në javën e 13-të të Abissnet Superiore, pikërisht në përballjen ndaj Partizanit.

Dënimi erdhi pas incidenteve në derbin me Tiranën, ku Daja u përjashtua nga arbitri Enea Jorgji pas protestave të vazhdueshme ndaj vendimeve të tij.

Daja humbet përballjen me të birin

Pezullimi do ta mbajë trajnerin jashtë pankinës në ndeshjet kundër Vorës, Skënderbeut dhe Elbasanit.

Pikërisht sfida ndaj verdhebluve pritej të kishte një rëndësi të veçantë për teknikun dinamovit, pasi do ta vendoste përballë djalit të tij, Glen Daja, i cili drejton Elbasanin.

Megjithatë, 59-vjeçari nuk do të ketë mundësinë ta përjetojë këtë duel nga stoli.

Gjoba mundëson rikthimin ndaj Partizanit

Megjithëse është dënuar me pesë ndeshje pezullim, Daja mund të përfitojë nga mundësia e parashikuar në rregulloren disiplinore për shlyerjen me gjobë të pjesës së mbetur të dënimit, pasi të ketë kryer tri takime pezullim.

Nëse Dinamo zgjedh këtë rrugë dhe plotësohen kushtet përkatëse, trajneri mund të rikthehet në pankinë në javën e 13-të, kundër Partizanit.

Pezullimi i tij lidhet me derbin e kryeqytetit, të përfunduar 1-1 në stadiumin “Niko Dovana”. Gjatë takimit, Daja protestoi ashpër ndaj arbitrimit të Enea Jorgjit, të cilin e akuzoi për favorizim të Tiranës.