TË FUNDIT
Kthehu te lajmet
Kombëtare

Ismajli kritikon Silvinjon: Futbolli i tij nuk ekziston më, Maran luan ndryshe

Ardian Ismajli nuk i ka kursyer kritikat për ish-trajnerin e Kombëtares shqiptare.

Ismajli kritikon Silvinjon: Futbolli i tij nuk ekziston më, Maran luan ndryshe

Ardian Ismajli nuk i ka kursyer kritikat për ish-trajnerin e Kombëtares shqiptare, Silvinjo, duke vlerësuar ndryshimet që ka sjellë Rolando Maran në lojën e kuqezinjve. Në konferencën për shtyp përpara ndeshjes me Finlandën, mbrojtësi theksoi se Shqipëria po luan një futboll më modern dhe më sulmues.

Kuqezinjtë do të përballen me Finlandën më 12 nëntor, në orën 20:45, në stadiumin “Air Albania”, në takimin e vlefshëm për javën e pestë të Ligës së Kombeve.

Kritikat për Silvinjon dhe vlerësimi për Maran

Ismajli bëri një krahasim të drejtpërdrejtë mes filozofisë së dy trajnerëve, duke theksuar se mënyra e lojës së Maran i përshtatet më shumë karakteristikave të futbollistëve shqiptarë.

“Mbrojtja më e mirë është sulmi. Silvinjo ka luajtur një futboll shumë difensiv, shumë statik. Ka dashur që çdo lojtar të mbajë pozicionin e tij. Ai futboll nuk ekziston. Futboll modern quhet me luajt si trajneri që është tani, Maran”, deklaroi mbrojtësi.

Sipas tij, presingu i lartë dhe loja agresive i japin Shqipërisë më shumë mundësi për të vënë kundërshtarët në vështirësi.

“Na ndihmon shumë më shumë nëse ikim në presing sipër. Mund ta kapim kundërshtarin që mund të bëjë gabime. Dhe jemi lojtarë që mund të luajmë 1 kundër 1 gjithë kohës dhe nuk e kemi problem”, shtoi Ismajli.

Mbrojtësi vlerësoi edhe punën e stafit teknik në analizimin e gabimeve dhe përgatitjen e skuadrës për dy takimet e fundit të grupit.

Finlanda dhe objektivi për vendin e parë

Duke folur për përballjen me Finlandën, Ismajli u shpreh i bindur se Shqipëria ka cilësinë e nevojshme për ta fituar grupin.

“Jemi përgatitur jashtëzakonisht mirë. E dimë rëndësinë e kësaj ndeshje. E kemi obligim për vendin e parë. Jemi ekip më kualitativ se të gjithë në grupin tonë, por duhet ta dëshmojmë në fushë”, tha ai.

Mbrojtësi u ndal edhe te humbja 2-1 në transfertën e parë ndaj Finlandës, duke kujtuar se kartoni i kuq dhe episodet e ndeshjes ndikuan në rezultat.

“Ndeshjen e parë në Finlandë, besoj që hiq kartonin e kuq, me të vërtetë kemi bërë ndeshjen ndoshta më të mirë në vitet e fundit. Episodet e bëjnë të veten, dhe me atë episod, ndeshja iku si iku”, deklaroi Ismajli.

Ai kërkoi më shumë kujdes në goditjet standarde, pasi Finlanda kishte shënuar dy herë në këtë mënyrë në përballjen e mëparshme.

“Air Albania” dhe mbështetja e tifozëve

Ismajli hodhi poshtë idenë se futbollistët mund të ndiejnë presion kur luajnë përpara tifozëve shqiptarë.

“Nuk besoj që çunat kanë panik ose si të them, stres, kur luajnë para tifozëve tonë. Janë numri 12 për ne. Jam shumë i sigurt që sa herë jemi si vendës, kemi paraqitje shumë të mira”, u shpreh ai.

Mbrojtësi kujtoi edhe mbështetjen e tifozëve në ndeshjen ndaj San Marinos, kur Shqipëria arriti të siguronte fitoren pavarësisht vështirësive.

“Pika jonë e fortë është ‘Air Albania’. Varet nga rezultati, por dhe mos të jetë rezultati, ata gjithmonë do na përkrahin. E kanë treguar gjatë gjithë këtyre viteve. T’i bëjmë krenar, të japim shpirtin në fushë dhe e rëndësishme është rezultati”, përfundoi Ismajli.

Shqipëria kryeson grupin me nëntë pikë, dy më shumë se Finlanda dhe Bjellorusia. Pas sfidës së 12 nëntorit, kuqezinjtë do të luajnë më 15 nëntor ndaj Bjellorusisë, në takimin që mbyll fazën e grupeve.