TË FUNDIT
Kthehu te lajmet
Kombëtare

Italia e kërkon, Shqipëria e ëndërron, nis gara për portierin e Serie A

Emri i Elia Kapriles ka nisur të lidhet me Kombëtaren shqiptare.

Italia e kërkon, Shqipëria e ëndërron, nis gara për portierin e Serie A

Emri i Elia Kapriles ka nisur të lidhet me Kombëtaren shqiptare. Portieri i Kaljarit ka një partnere shqiptare dhe në rrjet është diskutuar mundësia që ai të pajiset në të ardhmen me shtetësi shqiptare.

Megjithatë, ky do të ishte vetëm një hap administrativ dhe nuk do ta bënte automatikisht të aktivizueshëm nga Shqipëria. Rregullat e FIFA-s kërkojnë që një futbollist që merr një shtetësi të re të plotësojë edhe kritere të tjera lidhjeje me vendin, si origjina familjare, vendlindja ose një periudhë e caktuar qëndrimi. Lidhja përmes partneres nuk mjafton më vete.

Për momentin nuk ka asnjë konfirmim për kontakte mes Kapriles dhe Federatës Shqiptare të Futbollit. Diskutimi mbetet në nivelin e një mundësie të përfolur në rrjet.

Në Itali e shohin si kandidat për Kombëtaren

Ndërsa në Shqipëri diskutohet për një afrim të mundshëm, në Itali portieri po shihet si kandidat për një ftesë nga përfaqësuesja e kaltër.

Paraqitjet e Kapriles me Kaljarin kanë tërhequr vëmendjen, ndërsa trajneri Fabio Pisakane e konsideron të ligjshme ambicien e tij për të arritur në Kombëtaren italiane.

“Është një djalë i jashtëzakonshëm që më ka ndihmuar shumë. Një lider i padiskutueshëm i skuadrës. Në sjellje duket si veteran, është ambicioz dhe e tërheq ekipin pas vetes”, deklaroi Pisakane për “DAZN”.

Trajneri i Kaljarit pranoi se portieri ka të drejtë të synojë fanellën e Italisë, duke shtuar se duhen respektuar edhe zgjedhjet e stafit teknik të përfaqësueses.

Në këto kushte, pista shqiptare mbetet më shumë një hipotezë sesa një mundësi konkrete. Kaprile po fiton terren në Itali dhe, përpara çdo diskutimi sportiv me Shqipërinë, duhet të sqarohet nëse ai mund t’i plotësojë kriteret e FIFA-s.