Mundësia që Elia Kaprile të veshë fanellën e Kombëtares shqiptare ka tërhequr vëmendjen e mediave italiane. Lajmi për pajisjen e portierit të Kaljarit me pasaportë shqiptare është pasqyruar gjerësisht përtej Adriatikut, ndërsa diskutimet janë përqendruar te pengesat që mund të dalin nga rregulloret e FIFA-s.
Mes mediave që kanë trajtuar këtë çështje është edhe “SportMediaset”, e cila ka analizuar situatën e 25-vjeçarit, duke e krahasuar me raste të ngjashme në futbollin ndërkombëtar.
SportMediaset: Pasaporta nuk mjafton, duhet miratimi i FIFA-s
Sipas medias italiane, dokumentet e publikuara në Shqipëri tregojnë se Kaprile është pajisur me pasaportë shqiptare, çka teorikisht mund ta bëjë një alternativë për trajnerin Rolando Maran.
Megjithatë, marrja e shtetësisë nuk garanton automatikisht të drejtën për të përfaqësuar kuqezinjtë.
“Media të ndryshme shqiptare kanë publikuar dokumente me të cilat Shqipëria i ka dhënë një pasaportë Elia Kapriles. Ndaj portieri i Kaljarit mund të bëhet të paktën teorikisht, lojtar që mund të ftohet në ndeshjet e ardhshme të Kombëtares së Rolando Maran, edhe pse duhet pritur më parë miratimi përfundimtar nga FIFA”, shkruan “SportMediaset”.
Çështja kryesore lidhet me faktin se Kaprile nuk ka origjinë shqiptare. Lidhja e tij me Shqipërinë vjen përmes bashkëshortes, e cila është shqiptare.
Rasti i Janelt, precedenti që shqetëson italianët
Për të shpjeguar vështirësitë e mundshme, “SportMediaset” ka sjellë në vëmendje rastin e Vitaly Janelt.
Mesfushori kishte kërkuar të përfaqësonte Bosnjë-Hercegovinën për shkak të bashkëshortes së tij boshnjake, megjithëse nuk kishte origjinë nga ky vend.
Sipas medias italiane, FIFA nuk e miratoi ndryshimin e përfaqësueses, ndërsa Janelt më pas debutoi me Kombëtaren e Gjermanisë.
Ky precedent ngre pikëpyetje edhe për Kaprilen, pasi lidhja familjare përmes bashkëshortes mund të mos jetë e mjaftueshme për të plotësuar kriteret e FIFA-s.
Kaprile ka qenë pjesë e Italisë, por nuk ka debutuar me ekipin A
Portieri i Kaljarit ka një histori me përfaqësueset italiane të moshave, duke luajtur për ekipet U18 dhe U21.
Më 7 nëntor 2025, ai mori edhe një ftesë për Kombëtaren A nga trajneri i atëhershëm, Gennaro Gattuso, por nuk pati mundësinë të aktivizohej.
Ndërkohë, paraqitjet e tij me Kaljarin kanë tërhequr vëmendje gjatë sezonit. Të dhënat statistikore të publikuara nga “Sofascore” pasqyrojnë ecurinë e portierit, i cili po kërkon të konsolidojë pozitat e tij në futbollin italian.
Edhe trajneri i Kaljarit, Fabio Pisacane, kishte deklaruar më parë se, duke parë zhvillimin e Kapriles, ishte e natyrshme që ai të synonte një vend në një ekip kombëtar.
Për momentin, mundësia e aktivizimit me Shqipërinë mbetet e hapur vetëm në nivel diskutimesh. Pasaporta shqiptare përbën një zhvillim të rëndësishëm, por e ardhmja ndërkombëtare e Kapriles do të varet nga plotësimi i kushteve të FIFA-s.




