Ivan Balliu ka reaguar për herë të parë pas vendimit për t'u tërhequr nga Kombëtarja shqiptare. Mbrojtësi 34-vjeçar ka publikuar një mesazh emocional në rrjetet sociale, duke i dhënë fund një rrugëtimi nëntëvjeçar me fanellën kuqezi.
Futbollisti i Rayo Vallecanos, i cili e kishte menduar prej muajsh këtë vendim, falënderoi shokët e skuadrës, trajnerët, drejtuesit dhe tifozët shqiptarë për mbështetjen gjatë karrierës së tij ndërkombëtare.
Balliu emocionon me mesazhin e lamtumirës: Kombëtarja u bë familja ime e dytë
Në postimin e tij, mbrojtësi kujtoi momentet më të rëndësishme të rrugëtimit me Shqipërinë, duke veçuar pjesëmarrjen në Kampionatin Europian 2024.
“Nëntë vite më parë, nisa një rrugëtim që do të kthehej në një nga kapitujt më domethënës të jetës sime. Sot, duke parë pas, kuptoj se sa shumë më ka dhënë kjo fanellë”, shkroi Balliu.
“Nëntë vite emocionesh, sakrificash, miqësish dhe kujtimesh të paharrueshme. Kombëtarja u bë familja ime e dytë dhe përfaqësimi i Shqipërisë ka qenë gjithmonë një nga nderet më të mëdha të karrierës sime”, vijoi ai.
Balliu theksoi se pjesëmarrja në EURO 2024 do të mbetet një nga kujtimet më të veçanta të karrierës së tij.
“Pjesëmarrja në EURO 2024 do të mbetet përgjithmonë një nga momentet për të cilat ndihem më krenar”, u shpreh mbrojtësi.
Falënderime për tifozët dhe Armand Dukën
Në mesazhin e lamtumirës, Balliu nuk harroi të falënderonte të gjithë ata që e shoqëruan gjatë nëntë viteve me Kombëtaren.
“Një falënderim i përzemërt për të gjithë shokët e skuadrës, trajnerët dhe stafin që ndanë këtë rrugëtim me mua. Dhe për tifozët tanë të jashtëzakonshëm, faleminderit për dashurinë, pasionin dhe mbështetjen tuaj të pakushtëzuar. Ju e bëtë çdo moment edhe më të veçantë”, shkroi ai.
Mbrojtësi e mbylli postimin me një mesazh mirënjohjeje, duke përmendur edhe presidentin e Federatës Shqiptare të Futbollit, Armand Duka.
“Largohem me zemrën plot mirënjohje dhe krenari, duke e ditur se një pjesë e imja do t’i përkasë gjithmonë kësaj familjeje.
Nëntë vite në zemrën time. Një privilegj për gjithë jetën.
Faleminderit, Shqipëri! Faleminderit, Armand Duka! Përjetë Kuqezi!”
Largimi i Balliut, një tjetër mungesë për mbrojtjen e Shqipërisë
Tërheqja e Ivan Balliut vjen në një moment kur Kombëtarja shqiptare po përballet me mungesë alternativash në krahun e djathtë të mbrojtjes.
Situata e Elseid Hysajt, i cili mbetet pa skuadër, ka shtuar vështirësitë në këtë repart, ndërsa trajneri Rolando Maran ka ftuar për herë të parë mbrojtësin e Dinamo City-t, Ysni Ismaili.
Balliu e mbyll rrugëtimin me Shqipërinë pas nëntë vitesh dhe 24 ndeshjesh ndërkombëtare, me pjesëmarrjen në EURO 2024 si një nga momentet më të rëndësishme.
Për mbrojtësin e Rayo Vallecanos, aventura me kuqezinjtë ka përfunduar në fushë, por lidhja me Shqipërinë mbetet e pandryshuar.




