Mislav Karoglan e nisi me një humbje të rëndë aventurën në pankinën e Partizanit. Trajneri kroat komentoi disfatën 4-1 ndaj Vorës, duke pranuar problemet në mbrojtje dhe nevojën për të ndryshuar situatën e skuadrës, që pas shtatë javësh mban vendin e fundit në Abissnet Superiore.
Të kuqtë kanë grumbulluar vetëm katër pikë dhe kanë pësuar 17 gola, një bilanc negativ i paprecedentë për klubin në këtë fazë të kampionatit. Në prononcimin për “RTSH”, Karoglan theksoi se ditët e para në drejtimin e Partizanit i kanë shërbyer për të kuptuar më mirë grupin dhe lojtarët tek të cilët mund të mbështetet.
Karoglan kritikon gabimet në mbrojtje
Pavarësisht rezultatit, trajneri kroat vlerësoi mënyrën se si skuadra e nisi takimin, por pranoi se gabimet në momente të caktuara i kushtuan shtrenjtë Partizanit.
“E nisëm mjaft mirë, e kontrolluam disi ndeshjen në minutat e para. Vora për herë të parë na ndëshkoi me atë gol nga 30 metra. Gol i shkëlqyer. Vijuam ta kontrollojmë ndeshjen dhe në tranzicionin e parë, me harkim në zonë na ndëshkuan për herë të dytë. Duhet të jemi më të mirë, më të qëndrueshëm. Nuk është disi e logjikshme që në çdo lëvizje të tyre të shënojnë gol. Dua të kthjelloj mendimet e mia sepse kam vetëm disa ditë. Tani e kam të qartë se me kë lojtar dua të mbështetem dhe të fitojmë ndeshjen e radhës.
Punë psikologjike apo taktike në 3 ditë? Kam punuar në të dy aspektet. Bëra një analizë të kësaj ndeshje në anën disiplinore. E kam parë që ekipi ka pësuar shumë gola. Kam menduar që të rris këtë mundësi sa i përket mbrojtjes. Në pjesën e parë e mbajtëm topin. Vora nuk kishte asnjë shans. Në pjesën e dytë me anë të një tranzicioni, Vora na goditi me atë penallti. Në këto situata ne duhet të mbrohemi sa më mirë. Duhet të largojmë këto gabime dhe të mos përsëriten. Çdokush duhet të marrë përgjegjësi, të bëhet më i mirë. Të analizojmë këtë humbje, ta pranojmë dhe të jemi më mirë në ndeshjen tjetër.
Dëmtimet shqetësojnë trajnerin e Partizanit
Karoglan pranoi se po përballet me një situatë të pazakontë në karrierën e tij, pasi më parë ka drejtuar skuadra që synonin pjesëmarrjen në kompeticionet europiane. Ai përmendi gjithashtu mungesat e rëndësishme që kanë kufizuar alternativat e tij.
Është një situatë e re për mua. Në çdo klub që kam qenë kam luftuar për Europë. E di në cilin klub kam ardhur dhe e di situatën. Tani e di se çfarë duhet për të bërë. Kemi shumë dëmtime. U dëmtua edhe Mija në nxehje, Aliu dhe Skuka që janë shumë të rëndësishëm për ne. Në këtë moment që jemi duhet të mbijetojmë këto gjëra dhe të marrim rezultate të mira në të ardhmen.
Ne kishim idetë e para me Mijan. Është një lojtar me fizik. Luajnë shumë topa te Pedro. Insistoj që ne duhet të mbrohemi sa më mirë në situata të tilla. Me personalitet”, u shpreh Karoglan për “RTSH”.
Humbja ndaj Vorës e mban Partizanin në fund të renditjes, ndërsa trajneri kroat kërkon reagim të menjëhershëm. Përmirësimi i organizimit mbrojtës dhe shmangia e gabimeve do të jenë ndër prioritetet e tij për ndeshjen e ardhshme.




