TË FUNDIT
Kthehu te lajmet
Bota

Kërkesa që vuri në lëvizje Dukën, Ceferin ndryshon vendimin për të ardhmen

Aleksander Ceferin synon të qëndrojë në krye të UEFA-s edhe pas vitit 2027. Presidenti aktual ka njoftuar drejtuesit e 55 federatave anëtare se do të kandidojë për një mandat të fundit.

Kërkesa që vuri në lëvizje Dukën, Ceferin ndryshon vendimin për të ardhmen

Aleksander Ceferin synon të qëndrojë në krye të UEFA-s edhe pas vitit 2027. Presidenti aktual ka njoftuar drejtuesit e 55 federatave anëtare se do të kandidojë për një mandat të fundit.

Gjatë muajve të fundit, federatat kombëtare i kishin kërkuar unanimisht sllovenit të rishikonte vendimin e mëparshëm për të mos kërkuar rizgjedhjen. Ceferin e ka pranuar kërkesën dhe pritet të paraqesë kandidaturën në Kongresin e 51-të të Zakonshëm të UEFA-s.

Kongresi do të zhvillohet më 22 prill 2027 në Astana të Kazakistanit. Mes mbështetësve të kandidaturës së tij është edhe presidenti i FSHF-së, Armand Duka, i cili mban postin e zëvendëspresidentit të UEFA-s.

“Dua t’i falënderoj federatat kombëtare për besimin. Gjatë viteve të fundit jemi përballur me sfida të jashtëzakonshme dhe i kemi përballuar si një skuadër e bashkuar. Ka ende shumë punë të rëndësishme për të bërë dhe për këtë arsye e kam pranuar kërkesën e tyre”, deklaroi Ceferin.

Ai theksoi se synimi mbetet ruajtja e unitetit të futbollit europian dhe përgatitja e UEFA-s për të ardhmen.

“Ambicia ime mbetet e njëjtë: ta mbajmë të bashkuar futbollin europian, ta bëjmë sportin tonë më të fortë dhe ta lëmë UEFA-n të gatshme për gjeneratën e ardhshme. I jam mirënjohës edhe familjes sime, sepse ky vendim kërkon shumë prej tyre dhe nuk do të mund ta merrja pa mbështetjen e tyre”, shtoi ai.

UEFA kërkon ndryshime në drejtimin e FIFA-s

Takimi i zhvilluar në Berlin u përqendrua edhe te qeverisja dhe e ardhmja e FIFA-s. UEFA dhe federatat anëtare, me përjashtim të Federatës së Futbollit të Azerbajxhanit, kanë rënë dakord për një qëndrim të përbashkët në favor të reformimit të organizatës botërore.

Sipas qëndrimit të shprehur gjatë takimit, federatat europiane kanë humbur besimin te drejtimi aktual i FIFA-s. Ato vlerësojnë se ndryshimet institucionale nuk janë të mjaftueshme dhe se organizata ka nevojë edhe për një lidership të ri.

Kandidati i ardhshëm, sipas tyre, duhet të jetë një figurë e respektuar dhe bashkuese, me përvojë në futboll dhe me angazhim të qartë ndaj reformave, integritetit dhe pavarësisë së FIFA-s.

Një tjetër takim i 55 federatave anëtare të UEFA-s pritet të zhvillohet deri më 17 nëntor 2026.