TË FUNDIT
Kthehu te lajmet
Moshat

Kildman Lilo merr vëmendjen në Europa League, 12 pritje dhe nota 8.92

Një tjetër gardian kuqezi ka tërhequr vëmendjen me paraqitjen e tij në arenën europiane.

Kildman Lilo merr vëmendjen në Europa League, 12 pritje dhe nota 8.92

Ndërsa emri i Elia Kapriles po përmendet si një përforcim i mundshëm për portën e Kombëtares shqiptare, një tjetër gardian kuqezi ka tërhequr vëmendjen me paraqitjen e tij në arenën europiane.

Bëhet fjalë për Kildman Lilon, portierin 23-vjeçar të OFI-t të Kretës, i cili ka spikatur në përballjen kundër Bayer Leverkusenit në Ligën e Europës.

Lilo ishte një prej protagonistëve të skuadrës greke, duke regjistruar plot 12 pritje ndaj gjuajtjeve që shkuan në kuadratin e portës së tij.

Paraqitja e portierit shqiptar nuk kaloi pa u vënë re. Faqja e specializuar “WhoScored” e vlerësoi me notën 8.92, ndërsa e përfshiu edhe në formacionin më të mirë të javës në Europa League.

Për 23-vjeçarin, kjo paraqitje përbën një tjetër mundësi për të tërhequr vëmendjen, edhe në një periudhë kur konkurrenca për portën e Kombëtares është në qendër të diskutimeve.

Lilo ka qenë më parë pjesë e Shqipërisë U21, me të cilën numëron nëntë paraqitje. Aktualisht, vlera e tij në treg përllogaritet në 500 mijë euro nga “Transfermarkt”.

Ndërkohë që Kaprile është përfolur si një alternativë e re për kuqezinjtë, paraqitja e Lilos në Europë sjell në vëmendje edhe një portier shqiptar që po kërkon të bëjë emër përmes paraqitjeve në fushë.