TË FUNDIT
Kthehu te lajmet
Kombëtare

Kombëtarja/ Lista e të përjashtuarve, mungojnë edhe talentet e Serie A

Maran surprizon me mungesat.

Kombëtarja/ Lista e të përjashtuarve, mungojnë edhe talentet e Serie A

Lista e Rolando Maranit për dy ndeshjet vendimtare të Nations League ndaj Finlandës dhe Bjellorusisë ka sjellë jo pak diskutime. Trajneri i Kombëtares shqiptare ka zgjedhur t'i besojë kryesisht grupit të mëparshëm, duke lënë jashtë disa futbollistë të njohur, por edhe talente që po spikasin me klubet e tyre.

Nëse mungesat e Thomas Strakoshës, Armando Brojës dhe Berishës lidhen me probleme fizike, situata është ndryshe për lojtarët që nuk janë përfshirë për arsye teknike.

Nga Nedim Bajrami dhe Jasir Asani te Marash Kumbulla e Indrit Tuci, lista e futbollistëve që mbeten jashtë është e gjatë.

Tre portierë jashtë, Maran nuk fton Lilon

Në repartin e portës, tekniku italian ka zgjedhur Etrit Berishën, Mario Dajsinanin dhe Alen Sherrin.

Jashtë grumbullimit kanë mbetur Elhan Kastrati dhe Simon Simoni, dy portierë që kanë qenë më parë në vëmendjen e Kombëtares.

Një tjetër emër që bie në sy është ai i Lilos, i cili po zhvillon paraqitje pozitive në kampionatin grek me OFI-n e Kretës.

Maran konfirmoi gjatë konferencës për shtyp se e ka ndjekur portierin, por për këtë grumbullim ka preferuar të ruajë alternativat që kishte në dispozicion më parë.

Ndërkohë, Thomas Strakosha mungon për shkak të dëmtimit në dorë dhe nuk është ende në gjendje optimale për t'u rikthyer.

Kumbulla, Hadroj dhe Pllana mbeten jashtë mbrojtjes

Edhe në repartin defensiv ka disa mungesa të rëndësishme.

Marash Kumbulla nuk është përfshirë në listë, ndërsa jashtë kanë mbetur edhe Andi Hadroj dhe Pllana.

Një tjetër ndryshim lidhet me Ivan Balliun, i cili ka vendosur të tërhiqet përfundimisht nga Kombëtarja shqiptare.

Lajmi u konfirmua nga vetë Maran, i cili shpjegoi se mbrojtësi i Rayo Vallecanos po përballet me probleme fizike dhe ka zgjedhur të mos vazhdojë aventurën kuqezi.

Në këtë repart, risia kryesore është Ysni Ismaili i Dinamos, i afruar si alternativë për krahun e djathtë të mbrojtjes.

Bajrami, Mehmeti dhe Kerjota nuk bindin Maranin

Mesfusha është një tjetër repart ku zgjedhjet e trajnerit kanë lënë jashtë emra të njohur.

Nedim Bajrami vazhdon të mos jetë pjesë e planeve të këtij grumbullimi, ndërsa edhe Mehmeti nuk ka marrë ftesë.

Një rast i veçantë është ai i Sabah Kerjotës.

Futbollisti ishte grumbulluar nga Maran në ndeshjet e mëparshme, por nuk pati mundësi të aktivizohej, duke qëndruar në tribunë në katër takime.

Tashmë, ai nuk është përfshirë as në listën e nëntorit.

Trajneri ka shpjeguar se përzgjedhja është bazuar te forma, minutazhi dhe vazhdimësia e grupit që i ka dhënë garanci në ndeshjet e fundit.

Asani dhe Tuci në formë, por pa ftesë

Dy nga mungesat që tërheqin më shumë vëmendje janë Jasir Asani dhe Indrit Tuci.

Të dy futbollistët po kalojnë një periudhë pozitive me klubet përkatëse, por nuk kanë gjetur vend në përzgjedhjen e Maranit.

Tuci ka spikatur së fundmi me Mariborin, duke shënuar edhe golin vendimtar në derbin ndaj Olimpija Ljubljanës.

Ndërkohë, Asani vazhdon të mbetet jashtë grumbullimeve të trajnerit italian.

I pyetur për këta dy lojtarë, Maran theksoi se nuk i konsideron jashtë projektit të Kombëtares.

“Edhe për Asanin ka vëmendje. Këtë herë desha të jap vazhdimësi për garancitë që më dhanë djemtë. Por jo se të tjerët janë jashtë projektit, absolutisht”, deklaroi tekniku.

Durmishi dhe Kulla, talentet që presin mundësinë

Përtej emrave me përvojë, vëmendje meritojnë edhe disa futbollistë të rinj që po hedhin hapa të rëndësishëm në karrierë.

Arman Durmishi po përfshihet rregullisht në grumbullimet e Juventusit, ndërsa Gabriel Kulla ka marrë minuta edhe në Serie A me Sassuolon.

Të dy janë pjesë e brezit të ri të futbollistëve shqiptarë që po zhvillohen në Itali.

Përfshirja e tyre në Kombëtaren A mund të ishte një mundësi për t'i afruar gradualisht me grupin, por Maran ka preferuar të mos bëjë eksperimente për dy takimet vendimtare të Nations League.

Maran zgjedh vazhdimësinë për dy finalet e grupit

Shqipëria do të përballet me Finlandën më 12 nëntor në “Air Albania”, ndërsa tri ditë më vonë do të luajë ndaj Bjellorusisë në Budapest.

Objektivi është ruajtja e vendit të parë në Grupin C1 dhe sigurimi i ngjitjes në Ligën B.

Për këtë arsye, Maran ka vendosur t'i besojë kryesisht futbollistëve që kanë qenë pjesë e skuadrës në ndeshjet e mëparshme.

Megjithatë, mungesat e shumta dhe forma pozitive e disa lojtarëve të lënë jashtë pritet të vazhdojnë të jenë temë diskutimi rreth zgjedhjeve të trajnerit italian.