TË FUNDIT
Kthehu te lajmet
Diaspora

Kristian Shpendi zbulon ëndrrën: Dua të luaj me vëllain te Shqipëria

Kristian Shpendi po përjeton një nga periudhat më të mira të karrierës së tij.

Kristian Shpendi zbulon ëndrrën: Dua të luaj me vëllain te Shqipëria

Kristian Shpendi po përjeton një nga periudhat më të mira të karrierës së tij. Sulmuesi shqiptar i Çezenës është shpallur lojtari më i mirë i muajit shtator në Serie B, pas një fillimi sezoni ku realizoi gjashtë gola në pesë ndeshjet e para.

Në një intervistë për “Chiamarsi Bomber”, Shpendi ka folur për formën e tij, objektivat me klubin italian dhe emocionet e debutimit me Kombëtaren shqiptare. Megjithatë, një nga dëshirat më të mëdha të sulmuesit mbetet të luajë një ditë për Shqipërinë përkrah vëllait të tij binjak, Stivenit.

Shpendi: Nuk e prisja këtë fillim sezoni

Sulmuesi pranoi se rezultatet individuale i kanë tejkaluar pritshmëritë, por theksoi se nuk dëshiron të vendosë një objektiv të caktuar golash.

“Sigurisht që ka qenë një fillim i mirë dhe për të qenë i sinqertë, nuk e prisja. Megjithatë, në mendjen time, qëllimi ishte të nisnim fuqishëm, si ekip ashtu edhe individualisht, duke shënuar disa gola, gjë që është gjithmonë pozitive. Nuk kam një shifër specifike golash që synoj, preferoj t’i marr gjërat ndeshje pas ndeshjeje, të hyj në fushë, të kontribuoj për ekipin dhe të përpiqem të shënoj. Nuk jam i fiksuar pas një numri të caktuar, por çdo vit përpiqem të tejkaloj atë që kam arritur në sezonin e kaluar”.

Shpendi pranoi gjithashtu se ka ende aspekte të lojës që kërkon t'i përmirësojë, veçanërisht rolin e tij si pikë referimi për skuadrën.

“Ka shumë gjëra që duhet t’i përmirësoj, duke filluar nga ajo që të mundohem të jem një pikë referimi më e fortë për ekipin dhe shokët e mi të skuadrës. Është diçka për të cilën po punoj shumë vitet e fundit, do të dëshiroja të isha një shembull për të gjithë”.

Objektivi i Çezenës dhe ndikimi i trajnerit Diamanti

Pavarësisht golave të sulmuesit shqiptar, Çezena nuk ka marrë të gjitha pikët që priste në fillim të kampionatit. Shpendi pranoi se skuadra ka paguar disa gabime dhe mungesën e përqendrimit.

“Mendoj se po. Për shkak të pak fatit të keq, por edhe të mangësive tona dhe rënieve të përqendrimit, mund të kishim marrë disa pikë më shumë. I kemi analizuar gabimet tona për të kuptuar pse nuk arritëm të siguronim më shumë pikë dhe po punojmë për ta kompensuar këtë në ndeshjet e ardhshme”.

Sa i përket objektivit sezonal, ai theksoi se qëllimi kryesor mbetet sigurimi i qëndrimit në Serie B.

“Seria B është një ligë unike dhe shumë e vështirë. E nisëm me qëllimin për të siguruar mbijetesën në ligë, duke arritur sa më shpejt pikët e nevojshme për të qëndruar në këtë kategori. Do të shohim se çfarë tjetër mund të arrijmë në vazhdim, por objektivi ynë kryesor mbetet mbijetesa”.

Sulmuesi vlerësoi edhe punën e trajnerit Diamanti, duke nënvizuar ndikimin e tij në aspektin individual dhe në atmosferën e skuadrës.

“Trajneri është një figurë kyçe, si për ekipin ashtu edhe për mua personalisht. Ai na ka dhënë shumë besim dhe guxim, si dhe na ka sjellë gëzim në punën e përditshme. Një kombinim mes lumturisë dhe një etike të fortë pune, që po jep rezultate të mira. Në planin personal, ai ka qenë një ndihmë e madhe; në fillim të sezonit folëm se çfarë duhet të bëj dhe ku mund të përmirësohem. Ai po na jep një shtysë të jashtëzakonshme të gjithëve. Sa i përket pyetjes nëse ai e ka ende “këmbën e nxehtë”? Do të thosha po, ai e godet topin në mënyrë të jashtëzakonshme”.

Debutimi me Shqipërinë, një moment i veçantë

Shpendi u ndal edhe te debutimi zyrtar me Kombëtaren shqiptare, të cilin e përjetoi me emocione të mëdha. Fakti që ndeshja u zhvillua në San Marino, ku kishte luajtur për katër vite gjatë fëmijërisë, e bëri këtë moment edhe më të rëndësishëm.

“Isha ​​jashtëzakonisht i lumtur. Ishte diçka që e shpresoja dhe e dëshiroja vërtet të ndodhte. Dhe fakti që ndodhi në San Marino, një vend me të cilin kam një lidhje të veçantë, pasi kam luajtur atje për katër vite kur isha fëmijë, ishte diçka e jashtëzakonshme. Debutimi para familjes sime ishte i mrekullueshëm; besoj se në atë moment, ata ishin njerëzit më të lumtur në të gjithë Shqipërinë”.

Ëndrra për të luajtur me Stivenin në Kombëtare

Një pjesë e rëndësishme e intervistës iu kushtua marrëdhënies me vëllain binjak, Stiven Shpendin.

Kristiani tregoi se të dy flasin vazhdimisht për mundësinë që një ditë të luajnë së bashku me fanellën kuqezi, duke ndjekur shembullin e vëllezërve Esposito në Kombëtaren italiane.

“Mendoj për këtë çdo ditë, është praktikisht një nga qëllimet e mia, edhe me Stivenin flasim për këtë. Do të ishte një ëndërr të grumbulloheshim së bashku, të debutonim dhe të luanim një ndeshje krah për krah, ashtu siç bënë vëllezërit Espozito. Jam i sigurt se për ta ishte një përvojë unike, ndërsa unë dhe vëllai im do të përpiqemi ta realizojmë të njëjtën ëndërr. Nuk kam asnjë dyshim për Stivenin, herët a vonë, do të vijë edhe radha e tij në Kombëtare”.

Sulmuesi foli edhe për lidhjen e veçantë mes tyre dhe konkurrencën që i shoqëron në futboll.

“Jemi shumë të lidhur, nuk jemi thjesht vëllezër të zakonshëm; duke qenë binjakë na bashkon një lidhje e veçantë. Flasim çdo ditë, pas stërvitjes marrim njëri-tjetrin në telefon për të pyetur se si shkoi, e kështu me radhë. Ka konkurrencë, po, por është gjithmonë e shëndetshme. Nëse unë nuk shënoj, por shoh vëllain tim të shënojë, kjo më gëzon. Ta shoh atë të lumtur, më bën edhe mua të lumtur. A kemi ndërruar ndonjëherë vendet për shembull në shkollë? Epo, ishim në shkollë gjatë karantinës, kështu që, duke qenë në shtëpi, ishte pak më e lehtë (qesh). Patjetër që pati situata disi të ndërlikuara, ku na u desh ta ndihmonim njëri-tjetrin…”