Trajneri i Vllaznisë, Csaba Laszlo, ka dalë përpara mediave në prag të klasikes kundër Tiranës, që do të zhvillohet më 24 tetor, në orën 18:30, në stadiumin “Loro Boriçi”. Tekniku i kuqebluve kërkon reagimin e skuadrës pas humbjes ndaj Egnatias, ndërsa theksoi se marrja e tri pikëve është objektivi kryesor.
Gjatë konferencës, Laszlo foli për problemet e shfaqura në ndeshjen e fundit, gjendjen e lojtarëve, merkaton dhe largimin e ndihmësit të tij, Ergi Borshi, një vendim për të cilin preferoi të mos jepte komente.
Klasikja me Tiranën, Laszlo kërkon kontrollin e emocioneve
Trajneri hungarez e konsideron përballjen me bardheblutë një ndeshje me rëndësi të veçantë, jo vetëm për skuadrën, por edhe për qytetin e Shkodrës.
“Kam pasur shumë derbi, kjo është shumë e rëndësishme për qytetin dhe ekipin. Më e rëndësishmja për ne është që të stabilizojmë pozitën tonë në tabelë, të marrim 3 pikët. E dimë që në çdo derbi, emocionet janë të larta”, deklaroi Laszlo.
Sipas tij, mënyra se si futbollistët do të menaxhojnë presionin mund të ndikojë në rezultatin përfundimtar.
“Duhet sa më tepër vëmendje ndaj Tiranës, lojtarët të jenë të fokusuar në fushë dhe të bëjnë çdo gjë për ekipin. Në fund është ekipi më i rëndësishëm”, shtoi ai.
Gabimet ndaj Egnatias dhe dëmtimi i Perezit
Laszlo u ndal edhe te disfata 3-1 në Rrogozhinë, duke veçuar penalltinë e shkaktuar në minutat e para dhe rastet e humbura përpara portës.
“Për mendimin tim, gabimi kryesor ishte në minutën e tretë. Nuk kushtuam vëmendje dhe u dhuruam një penallti. Kjo tregon se nga minuta e parë deri në të fundit duhet të jesh 100% në fushë”, shpjegoi tekniku.
Ai theksoi se skuadra ka punuar gjatë javës për të përmirësuar finalizimin, pasi Murataj dhe Perez kishin shpërdoruar mundësi të mira shënimi.
Ndërkohë, Vllaznia do të duhet të përballet edhe me mungesën e Perezit, i cili ka pësuar një dëmtim.
“Perez është dëmtuar fatkeqësisht për ditët në vijim. Pjesa tjetër është gati dhe duhet të tregojë që mund të vazhdojë”, deklaroi trajneri.
Kastrati dhe merkatoja, planet e trajnerit
Një tjetër temë e konferencës ishte gjendja e Kastratit, i cili është rikthyer pas një periudhe të gjatë larg fushave.
Laszlo vlerësoi përvojën e futbollistit, por theksoi se aktivizimi i tij duhet të menaxhohet me kujdes.
“Duhet ta shtyj në stërvitje që të pushojë pak. Duhet ta ruaj. Ishte gati gjysma e vitit jashtë, i duhet kohë që të rikthehet. Nuk duam që ta dëmtojmë, duhet ta mbajmë nën kontroll”, u shpreh ai.
Sa i përket përforcimeve, trajneri konfirmoi se klubi po punon në merkato, por nuk dëshiron afrime vetëm për të shtuar numrin e lojtarëve.
“Po punojmë në merkato. Ta bëjmë të mirë jo vetëm në numra. Kemi shumë diskutime për këtë pjesë. Për mua personalisht është e rëndësishme akademia dhe ekipi B”, theksoi Laszlo, duke lënë të kuptohet se do të vlerësohen edhe alternativat nga të rinjtë.
Largimi i Ergi Borshit, Laszlo ia kalon përgjegjësinë drejtuesve
I pyetur për largimin e ndihmëstrajnerit Ergi Borshi, tekniku i Vllaznisë zgjodhi të mos përfshihej në diskutimin mbi vendimin e klubit.
“E drejtë pyetja, e kuptoj. E shoh që klubi po shkon në shumë ndryshime. Nuk mund ta komentoj sepse kjo varet nga personat nga lart. Çdo gjë që po ndodh, mund të përgjigjet drejtori sportiv”, deklaroi ai, duke iu referuar Alban Hasanit.
Laszlo theksoi se përgjegjësia e tij lidhet me përgatitjen e skuadrës dhe rezultatet në fushë, ndërsa vendimet organizative u takojnë drejtuesve.
“Çfarë po ndodh nga pjesa jashtë, nuk është puna ime. Nuk dua ta komentoj apo të përfshi veten në këtë pjesë. Janë gjëra që nuk i kam në dorë”, shtoi trajneri.
“Çdo fitore na jep më shumë oksigjen”
Në përfundim, Laszlo theksoi se Vllaznia e ka analizuar kundërshtarin dhe është përgatitur për një ndeshje ku diferencën mund ta bëjnë detajet.
“Nuk dua të bëj një skuadër kundërshtare më të mirë se sa është, diferenca mes skuadrave nuk është mjaft e madhe. Ndonjëherë mund të jetë forma e ditës apo fati që e bën diferencën”, u shpreh ai.
Për trajnerin, përballja me Tiranën është një mundësi për të stabilizuar pozitat në renditje dhe për t'i dhënë skuadrës besimin e nevojshëm.
“Çdo fitore na jep më shumë oksigjen dhe që të bëjmë hapin e radhës. Kemi studiuar kundërshtarët, vendosim çdo gjë bashkë. Në fund janë lojtarët që duhet të bëjnë punën e tyre”, përfundoi Laszlo.




