TË FUNDIT
Kthehu te lajmet
Kategoria Superiore

Laszlo zbulon prapaskenat e ardhjes te Vllaznia: Operacioni, ofertat e refuzuara dhe misioni në Shkodër

Csaba Laszlo është rikthyer në pankinë pas më shumë se një viti shkëputjeje nga drejtimi i skuadrave.

Laszlo zbulon prapaskenat e ardhjes te Vllaznia: Operacioni, ofertat e refuzuara dhe misioni në Shkodër

Csaba Laszlo është rikthyer në pankinë pas më shumë se një viti shkëputjeje nga drejtimi i skuadrave. Trajneri i Vllaznisë ka rrëfyer për gazetën “Szekely Sport” arsyet e pushimit, ndërhyrjen kirurgjikale që e mbajti larg fushës dhe rrethanat që e bindën të pranonte ofertën e klubit shkodran.

Tekniku me përvojë ndërkombëtare ka folur edhe për situatën e vështirë që gjeti te kuqeblutë, rëndësinë e motivimit të futbollistëve dhe objektivin për të ndryshuar sa më shpejt rezultatet.

Operacioni në gju dhe një vit larg pankinës

Përpara se të merrte drejtimin e Vllaznisë në fillim të tetorit, Laszlo kishte punuar për herë të fundit te Sepsi OSK, në pranverën e vitit 2025.

Në atë periudhë, trajnerit iu besua detyra për të shpëtuar skuadrën nga rënia prej elitës së futbollit rumun. Megjithatë, koha e kufizuar dhe rezultatet e pamjaftueshme nuk e lejuan të realizonte objektivin.

Pas kësaj eksperience, ai vendosi të qëndronte larg pankinës për më shumë se një vit. Arsyeja kryesore ishte një ndërhyrje kirurgjikale në gju, pas së cilës kishte nevojë për rikuperim të plotë.

Megjithatë, Laszlo thekson se gjatë kësaj periudhe nuk u shkëput nga futbolli.

“Edhe gjatë kësaj periudhe kam punuar në Universitetin e Shkencave Sportive të Debrecenit, ku jam ende i punësuar. E përfaqësoj institucionin në forume të ndryshme ndërkombëtare dhe mbaj leksione në kurse për përgatitjen e trajnerëve.

Pra, në thelb, nuk jam shkëputur nga futbolli. Pas largimit nga OSK-ja pata dy mundësi për t’u rikthyer si trajner. Në të dyja rastet ofertat erdhën nga klube të huaja, por në fund gjithçka dështoi për shkak të disa detajeve të vogla”, tregoi ai.

Pse pranoi ofertën e Vllaznisë?

Kontakti me klubin shkodran erdhi gjatë verës, ndërsa marrëveshja u konkretizua në fillim të tetorit.

Laszlo pranoi të merrte drejtimin e një skuadre me nëntë tituj kampionë, por që po kalonte një nga periudhat më të vështira të viteve të fundit.

Kur tekniku mori detyrën, Vllaznia ndodhej në fundin e renditjes dhe kishte nevojë urgjente për pikë.

Sipas tij, objektivi kryesor në këtë moment është largimi nga zona e rrezikut dhe sigurimi i qëndrimit në Kategorinë Superiore.

“Një nga detyrat më të vështira në këto raste është motivimi i lojtarëve. Problemet janë aty, ndaj duhet të kërkojmë zgjidhjet. Vitin e kaluar situata ishte e ngjashme edhe te Sepsi OSK-ja, kur mbijetesa varej nga tri ndeshjet e fundit dhe mua m’u besua kjo detyrë.

Edhe sot mendoj se, nëse do të na ishte njohur goli kundër Jashit, të cilin unë dhe shumë të tjerë e konsideruam të rregullt, mund t’ia kishim dalë”, deklaroi trajneri.

Laszlo beson se këtë herë ka një avantazh të rëndësishëm krahasuar me përvojën në Rumani: kohën.

Ndryshe nga Sepsi, ku kishte vetëm pak ndeshje për të ndryshuar situatën, te Vllaznia ka ende shumë javë në dispozicion për të punuar me skuadrën.

Fitorja ndaj Dinamos dhe humbja me Egnatian

Debutimi i trajnerit në pankinën shkodrane ishte pozitiv. Vllaznia mposhti 1-0 Dinamon, një nga skuadrat pretendente të kampionatit, që vinte pas katër fitoreve radhazi.

Për Laszlon, rëndësia e këtij rezultati shkonte përtej tri pikëve, pasi skuadra kishte nevojë të rikthente besimin.

“Vetëm fitoret mund ta zgjidhin një problem të tillë. Një fitore mund t’u japë të gjithëve qetësi për një javë. Pikërisht për këtë arsye, ndeshja e parë ishte shumë e rëndësishme, sepse u dha forcë të gjithëve.

Tashmë, me shumë mundësi, lojtarët besojnë më tepër se java që kaluam së bashku mund të jepte rezultate”, u shpreh ai.

Megjithatë, vazhdimësia nuk ishte ajo që pritej. Në transfertën ndaj Egnatias, Vllaznia pësoi humbje 3-1, pavarësisht se krijoi raste dhe pati periudha të mira loje.

Trajneri e konsideron menaxhimin psikologjik një nga aspektet më të rëndësishme të punës së tij. Sipas tij, në situata të tilla nuk mjafton vetëm përgatitja taktike, pasi futbollistët kanë nevojë të rifitojnë besimin dhe qetësinë.

Nga Ferencvaroshi te Sepsi, përvojat që i kujtojnë Vllazninë

Gjatë karrierës, Laszlo ka drejtuar skuadra në disa vende, përfshirë Skocinë, Indinë dhe Ugandën.

Ai ka marrë shpesh drejtimin e ekipeve në momente delikate, kur rezultatet dhe problemet jashtë fushës kishin krijuar një situatë të vështirë.

Një nga përvojat që i kujton më shumë gjendjen aktuale të Vllaznisë është ajo te Ferencvaroshi, në sezonin 2004-2005.

Në atë kohë, klubi hungarez përballej me probleme serioze financiare, që ndikonin drejtpërdrejt te futbollistët dhe puna e stafit teknik.

“Te Fradi, në atë kohë, nuk luftonim për të shmangur rënien nga kategoria, por për ta mbajtur skuadrën të bashkuar nga ana morale, në kushtet e një situate katastrofike financiare. Bonuset dhe shpeshherë edhe pagat vonoheshin. Për këtë arsye, vetëm 30 për qind të kohës mund t’ia kushtoja aspektit teknik të futbollit, ndërsa 70 për qind të mbetur duhej ta shpenzoja duke u marrë me faktorët e jashtëm. Në fund, pikërisht kjo situatë na bashkoi aq shumë, sa arritëm të kualifikoheshim në fazën e grupeve të Kupës UEFA”, kujtoi ai.

Situata të ngjashme ka përjetuar edhe te Dunajska Streda në Sllovaki dhe Hearts në Skoci, ku iu desh të punonte për të rikthyer stabilitetin pas rezultateve negative.

Laszlo: Ndryshimi i trajnerit duhet të sjellë rezultate

Për teknikun e Vllaznisë, përvoja është një ndihmë e rëndësishme, por ai pranon se çdo kampionat ka karakteristikat e veta.

Laszlo mendon se një trajner që merr drejtimin e një skuadre në krizë duhet të përshtatet shpejt me ambientin, të njohë lojtarët dhe të identifikojë problemet kryesore.

Sipas tij, ndryshimi në pankinë nuk duhet të kufizohet te një skemë e re taktike. Qëllimi kryesor është përmirësimi i rezultateve, i cili duhet të vijë sa më shpejt.

Trajneri mbetet i bindur se përvoja e fituar gjatë karrierës do ta ndihmojë të përballojë presionin në Shkodër.

Me një fitore dhe një humbje në dy ndeshjet e para, Laszlo e di se puna sapo ka nisur. Përpara e presin përballje të vështira, ndërsa objektivi është të rikthejë Vllazninë në një pozicion më të sigurt në renditjen e Superiores.