Futbollistët shqiptarë janë rikthyer menjëherë protagonistë me klubet e tyre pas angazhimeve me Kombëtaren në Nations League. Rey Manaj, Ernest Muçi dhe Indrit Tuci gjetën rrugën e rrjetës, ndërsa Taulant Seferi kontribuoi me asist.
Manaj shkëlqen me dy gola dhe një asist
Rey Manaj ishte protagonisti kryesor në fitoren 4-1 të Sivassporit ndaj Pendiksporit. Sulmuesi kuqezi shënoi në minutat 21 dhe 55, përpara se të asistonte Valon Ethemin për golin e tretë në minutën e 64-t.
Paraqitja e tij u vlerësua me notën 9.8 nga “Sofascore”, duke e bërë lojtarin më të vlerësuar të javës në Ligën e Parë turke.
Muçi dhe Tuci gjejnë rrjetën
Ernest Muçi shënoi në suksesin 3-0 të Trabzonsporit në transfertë ndaj Samsunsporit. Sulmuesi shqiptar zhbllokoi takimin në minutën e 28-të me një finalizim të bukur brenda zonës, duke realizuar golin e tij të dytë sezonal.
Në Slloveni shkëlqeu Indrit Tuci, autor i dy golave në barazimin 3-3 të Olimpija Ljubljanës ndaj Murës. Sulmuesi realizoi në minutat 31 dhe 52, por skuadra e tij nuk arriti ta ruante avantazhin.
Seferi kontribuon me asist
Taulant Seferi la gjurmë në fitoren 3-2 të Kayserisporit ndaj Manisas. Sulmuesi shqiptar dha pasimin vendimtar për Morenon në minutën e 52-të, në aksionin që solli golin e dytë të vendasve.
Titullarë me klubet e tyre u aktivizuan edhe Etrit Berisha, Berat Gjimshiti, Klisman Cake, Samuele Sina, Stavro Pilo, Qazim Laçi, Myrto Uzuni dhe Kristian Shpendi.
Nga stoli morën minuta Ylber Ramadani, Juljan Shehu, Sabah Kerjota dhe Armando Broja.




