TË FUNDIT
Kthehu te lajmet
Kombëtare

Manaj ndez Shqipërinë, kuqezinjtë mbyllin në avantazh pjesën e parë ndaj Bjellorusisë

Shqipëria ka mbyllur në avantazh 1-0 pjesën e parë ndaj Bjellorusisë.

Manaj ndez Shqipërinë, kuqezinjtë mbyllin në avantazh pjesën e parë ndaj Bjellorusisë

Shqipëria ka mbyllur në avantazh 1-0 pjesën e parë ndaj Bjellorusisë, në ndeshjen vendimtare të Grupit C1 të Ligës së Kombeve. Rey Manaj ishte protagonisti i 45 minutave të para, duke realizuar golin që për momentin i afron kuqezinjtë edhe më shumë me ngjitjen direkte në Ligën B.

Skuadra e Rolando Maranit zhvilloi një pjesë të parë pozitive në Budapest, duke krijuar disa mundësi shënimi dhe duke goditur edhe traversën me Kristjan Asllanin.

Manaj zhbllokon sfidën, Asllani ndalet nga traversa

Shqipëria e nisi ndeshjen me ritëm të lartë dhe rrezikoi që në minutën e dytë. Pas një goditjeje nga këndi, Qazim Laçi pati mundësinë të shënonte, por tentativa e tij u ndal nga një mbrojtës bjellorus pranë vijës fatale.

Kuqezinjtë vijuan të kërkonin golin dhe në minutën e 17-të Kristjan Asllani ishte shumë pranë avantazhit. Mesfushori lëshoi një goditje të fuqishme nga jashtë zonës, por topi u përplas në traversë.

Goli erdhi në minutën e 28-të, kur Rey Manaj mori topin në kufijtë e zonës dhe lëshoi një gjuajtje të fortë, duke mposhtur portierin Lapukhov.

Realizimi i sulmuesit i dha Shqipërisë epërsinë dhe qetësinë e nevojshme për të administruar pjesën e mbetur të fraksionit të parë.

Bjellorusia kërkon reagimin, kuqezinjtë krijojnë të tjera raste

Pas golit të pësuar, Bjellorusia u përpoq të reagonte. Në minutën e 34-t, Lukashov provoi nga distanca, por topi përfundoi mbi traversën e Etrit Berishës.

Rasti më i rrezikshëm për vendasit erdhi në minutën e 41-të, kur Shumanski u zhvendos nga krahu i majtë drejt qendrës dhe goditi me të djathtën. Topi kaloi shumë pranë shtyllës së largët.

Shqipëria pati mundësi të tjera për të dyfishuar rezultatin në fundin e pjesës së parë. Në minutën e 44-t, Manaj provoi sërish, por këtë herë portieri kundërshtar e kontrolloi gjuajtjen e tij.

Pak çaste më vonë, Arbër Hoxha mori një pasim nga Stavro Pilo, por tentativa e tij përfundoi jashtë kuadratit.

Pas një minute shtesë, skuadrat iu drejtuan dhomave të zhveshjes me rezultatin 1-0 në favor të Shqipërisë.

45 minuta larg vendit të parë dhe Ligës B

Shqipëria hyri në këtë përballje me 12 pikë, dy më shumë se Bjellorusia, dhe me avantazhin se edhe një barazim do t'i mjaftonte për të fituar grupin.

Goli i Manajt e ka përmirësuar edhe më shumë pozicionin e kuqezinjve, të cilët tashmë kanë përpara 45 minuta për të ruajtur rezultatin dhe për të siguruar matematikisht vendin e parë.

Një fitore në Budapest do ta mbyllte fushatën e Shqipërisë në Ligën e Kombeve me 15 pikë dhe do të vuloste ngjitjen direkte në Ligën B.

Bjellorusi-Shqipëri 0-1 (Pjesa e parë)

Shënues: Rey Manaj 28'