Rey Manaj vazhdon të shkëlqejë në Ligën e Parë turke. Sulmuesi shqiptar ka arritur në kuotën e tetë golave këtë sezon, pas dygolëshit në fitoren 4-1 të Sivassporit ndaj Pendiksporit.
Paraqitja e javës së nëntë i siguroi Manajt një vend në formacionin më të mirë të kampionatit. Sipas vlerësimeve të “Sofascore”, sulmuesi kuqezi mori notën 9.8, më e larta mes të gjithë futbollistëve të përzgjedhur.
Manaj shënoi dy herë dhe dha asistin për golin e Valon Ethemit, duke qenë protagonist në tri prej katër realizimeve të Sivassporit.
Në repartin ofensiv të formacionit të javës, shqiptari shoqërohet nga Ezeh i Keçiörengücü dhe Iheanacho i Bursasporit.
Edhe Ethemi mes më të mirëve
Pjesë e formacionit ideal është edhe Valon Ethemi. Ish-futbollisti i Kukësit realizoi pas asistit të Manajt dhe u vlerësua me notën 9.5, e dyta më e lartë e javës.
Dy futbollistët shqiptarë po udhëheqin Sivassporin në kampionat, ndërsa Manaj po konfirmohet si një prej sulmuesve më në formë të Ligës së Parë turke.




