Rej Manaj ishte protagonisti kryesor në fitoren 4-1 të Sivasporit ndaj Pendiksporit, në ndeshjen e javës së nëntë të kategorisë së dytë turke. Sulmuesi shqiptar shënoi dy gola dhe dhuroi një asist.
Manaj zhbllokoi rezultatin në minutën e 21-të. Pasi mori një pasim nga krahu i djathtë, ai kontrolloi topin në qendër të zonës, u kthye dhe realizoi me një goditje të ulët diagonale.
Sulmuesi kuqezi u shfaq sërish vendimtar në minutën e 55-të, kur shënoi golin e dytë të Sivasporit dhe kompletoi dygolëshin personal.
Paraqitjen e tij të shkëlqyer Manaj e pasuroi edhe me një asist në minutën e 64-t. Sulmuesi shërbeu Valon Ethemin, i cili realizoi golin e tretë të vendasve.
Sivaspori e mbylli takimin me fitoren 4-1, ndërsa Manaj doli nga fusha si një prej protagonistëve absolutë të ndeshjes.




