TË FUNDIT
Kthehu te lajmet
Kombëtare

Maran gati për debutimin zyrtar me Shqipërinë: “Kam parë uri dhe një tjetër vështrim te lojtarët”

Rolando Maran do të zhvillojë ndeshjen e parë zyrtare në pankinën e Shqipërisë. Pas dy humbjeve në miqësore, trajneri italian do të drejtojë kuqezinjtë kundër Bjellorusisë në sfidën hapëse të Ligës së Kombeve.

Maran gati për debutimin zyrtar me Shqipërinë: “Kam parë uri dhe një tjetër vështrim te lojtarët”

Rolando Maran do të zhvillojë ndeshjen e parë zyrtare në pankinën e Shqipërisë. Pas dy humbjeve në miqësore, trajneri italian do të drejtojë kuqezinjtë kundër Bjellorusisë në sfidën hapëse të Ligës së Kombeve. Përballë do të jetë një skuadër që vjen pas gjashtë rezultatesh pozitive radhazi nën drejtimin e Viktor Goncharenkos. Maran e vlerëson kundërshtarin, por beson se Shqipëria ka karakterin e nevojshëm për ta nisur mirë kompeticionin.

“Bjellorusia ka treguar se është një skuadër e fortë dhe kompakte. Po zhvillon një rrugëtim të mirë dhe kemi shumë respekt për ekipin që do të kemi përballë”, deklaroi trajneri.

“Kam parë cilësitë dhe karakterin e lojtarëve të mi. Kam parë një tjetër vështrim, dëshirë për të punuar, për të provuar dhe edhe për të gabuar, në mënyrë që të përmirësohemi. Për mua, këto janë kushtet e duhura për ta përballuar këtë ndeshje.”

Maran mban të fshehtë formacionin

Trajneri nuk dha shumë hollësi për formacionin që do të hedhë në fushë. Problemet fizike dhe mungesat e ditëve të fundit e kanë detyruar të provojë alternativa të ndryshme.

“Nesër nis vërtet aventura ime si trajner i Shqipërisë. Është një emocion që të jep krenari dhe të shtyn të japësh edhe më shumë. Kjo më motivon”, u shpreh Maran.

“Idetë i kemi të qarta. Kemi pasur disa probleme fizike dhe më është dashur të pushoj disa lojtarë, sidomos në një repart ku kemi pasur mungesa. Kushdo që do të zbresë në fushë, do ta bëjë këtë për të zhvilluar një ndeshje të mirë.” Disa futbollistë nuk kanë arritur të stërviten rregullisht gjatë grumbullimit. Gjithsesi, kjo situatë i ka dhënë stafit mundësinë të provojë zgjidhje të reja.

“Për shkak të mungesave kemi provuar disa gjëra të ndryshme dhe kam marrë përgjigje shumë të mira. Asllani dhe Shehu do të stërviten të dy sot. Pas seancës së mbrëmjes do të kem më shumë mundësi për të zgjedhur zgjidhjen e duhur”, shpjegoi italiani.

Alternativat për krahun e djathtë të mbrojtjes

Dëmtimi i Ivan Balliut dhe vendimi për të mos ftuar një zëvendësues kanë ngritur pikëpyetje për krahun e djathtë. Elseid Hysaj është i vetmi mbrojtës natyral në atë rol, por ka pasur pak minuta aktivizimi.

Maran deklaroi se nuk është i shqetësuar, pasi ka disa alternativa për atë pozicion. “Kemi lojtarë të tjerë që mund ta interpretojnë rolin sipas mënyrës se si dua të luajmë. Është edhe Sina, në varësi të asaj që do të kërkoj nga skuadra. Ismajli ka luajtur më parë si mbrojtës i djathtë, prandaj besoj se kemi mundësi zgjedhjeje”, përfundoi trajneri.