TË FUNDIT
Kthehu te lajmet
Kombëtare

Maran grumbulloi mbi 29 lojtarë, por vetëm një kuqezi ishte i paprekshëm

Rolando Maran ndërtoi një listë të zgjeruar për katër ndeshjet e para të Shqipërisë në Ligën e Kombeve.

Maran grumbulloi mbi 29 lojtarë, por vetëm një kuqezi ishte i paprekshëm

Rolando Maran ndërtoi një listë të zgjeruar për katër ndeshjet e para të Shqipërisë në Ligën e Kombeve. Fillimisht u grumbulluan 29 futbollistë, ndërsa dëmtimet dhe lëvizjet e mëvonshme sollën afrime të tjera në grup.

Megjithatë, trajneri italian aktivizoi vetëm 23 lojtarë gjatë përballjeve me Bjellorusinë, San Marinon dhe Finlandën.

Ismajli, i vetmi me minuta të plota

Dhjetë futbollistë u aktivizuan në të katërta ndeshjet, por vetëm Ardian Ismajli nuk u zëvendësua në asnjërën prej tyre. Mbrojtësi qëndroi në fushë gjatë të gjithë minutave dhe u shndërrua në pikën më të qëndrueshme të formacionit.

Kristjan Asllani dhe Berat Gjimshiti e ndjekin në renditjen e minutazhit, por të dy u zëvendësuan të paktën një herë.

Elseid Hysaj dhe Stavro Pilo humbën ndeshjen e parë në transfertë ndaj San Marinos, por i luajtën të plota tri sfidat e tjera ku u aktivizuan.

Manaj fiton garën në sulm

Rey Manaj renditet i katërti për numrin e minutave, me 275 të regjistruara në katër paraqitje. Kjo shifër tregon se sulmuesi mbetet zgjedhja e parë e Maranit për qendrën e repartit ofensiv.

Alternativat e tij kanë pasur dukshëm më pak hapësira. Myrto Uzuni luajti 179 minuta në katër ndeshje, Mirlind Daku regjistroi 81 minuta në tri paraqitje, ndërsa Kristian Shpendi qëndroi në fushë vetëm 24 minuta në një takim.

Diferenca në minutazh tregon se hierarkia në sulm është e qartë, me Manajn që vazhdon të ketë besimin e trajnerit italian.

Të grumbulluar, por pa asnjë minutë

Disa futbollistë e përfunduan këtë seri ndeshjesh pa u aktivizuar. Simon Simoni, Alain Taho, Feta Fetai, Klisman Cake, Naser Aliji dhe Sabah Kerjota nuk morën minuta.

Rasti më i veçantë ishte ai i Kerjotës, i cili u grumbullua si një nga risitë e Maranit, por nuk u përfshi asnjëherë në listën e ndeshjes.