TË FUNDIT
Kthehu te lajmet
Kombëtare

Maran mesazh kuqezinjve: Rëndësi ka fitorja, jo kush shënon

Trajneri i Kombëtares shqiptare, ka kërkuar më shumë përgjegjësi

Maran mesazh kuqezinjve: Rëndësi ka fitorja, jo kush shënon

Trajneri i Kombëtares shqiptare, Rolando Maran, ka kërkuar më shumë përgjegjësi dhe lojë kolektive nga futbollistët përpara përballjes vendimtare me Finlandën. Në konferencën për shtyp, tekniku italian u ndal te individualizmi i shfaqur ndaj San Marinos, pritshmëritë për sulmuesit dhe rëndësia e mbështetjes së tifozëve.

Shqipëria do të presë Finlandën të enjten, më 12 nëntor, në orën 20:45, në stadiumin “Air Albania”, në ndeshjen e vlefshme për javën e pestë të Ligës së Kombeve.

“E rëndësishme është fitorja, jo kush bën golin”

Maran pranoi se gjatë ndeshjes së fundit ndaj San Marinos kishte vënë re një tendencë të futbollistëve për të kërkuar suksesin individual, duke zbuluar se kishte ndërhyrë që në pushimin mes pjesëve.

“Këtë e kemi zgjidhur në periudhën mes pjesëve ndaj San Marinos, që qartësuam që është e rëndësishme fitorja dhe jo kush bënte golin”, deklaroi trajneri.

Italiani nuk mbeti i kënaqur as me mënyrën se si skuadra menaxhoi disa momente të takimit, veçanërisht pas golit të pësuar.

“Skuadra gaboi dhe pësoi gol, pastaj bëri 8 gjuajtje në portë dhe e rregulloi. Duhej rregulluar më parë, kjo është e sigurt”, theksoi Maran.

Për trajnerin, përballja me Finlandën kërkon përqendrim më të madh dhe shmangien e gabimeve që mund të ndikojnë në rezultat.

Përgjigjja për trajnerin e Finlandës: Besoj te skuadra ime

I pyetur për deklaratat optimiste të trajnerit kundërshtar, Maran u shpreh i bindur te aftësitë e futbollistëve shqiptarë.

“Nuk është gabim të besosh te ekipi ynë. Unë kam bindjet e mia të forta se i kam parë të punojmë, di si do shkojmë në fushë, do shtyhemi nga një stadium fantastik dhe janë të gjitha kushtet të bëjmë mirë”, u shpreh ai.

Tekniku italian theksoi se besimi i tij mbështetet te puna e zhvilluar gjatë përgatitjeve dhe te përkushtimi që ka parë nga lojtarët.

Maran pret gola nga sulmuesit

Një tjetër temë e konferencës ishte forma e sulmuesve dhe pritshmëritë që ata të shënojnë edhe me fanellën e Kombëtares.

“Shpresojmë të gjithë të shohim golat, e shpresojmë ne, skuadra, të gjithë tifozët”, deklaroi Maran.

Megjithatë, trajneri përsëriti se objektivi kryesor mbetet rezultati i skuadrës dhe jo protagonizmi i një futbollisti të caktuar.

“Tifozët besojnë te ne, duhet t'i respektojmë”

Maran foli edhe për atmosferën që pritet të krijohet në “Air Albania”, duke e konsideruar mbështetjen e tifozëve një përgjegjësi të madhe për skuadrën.

“Nëse ka tifozë, është se besojnë te ne, kjo është e para që duhet të dimë dhe respektojmë”, tha ai.

“Ne duhet të jemi të aftë të çojmë këtë krenari e përkushtim në fushë me shumë përgjegjësi, sepse përfaqësojmë diçka të rëndësishme dhe këtë e dimë shumë mirë”, shtoi tekniku italian.

“Çdo lojtar duhet të dalë nga fusha pa pengje”

Në fund, Maran dha një mesazh të qartë për futbollistët, duke kërkuar që secili të japë maksimumin për fanellën kuqezi.

“Gjëja më e rëndësishme është që secili individualisht duhet të dalë nga fusha pa pengje, nëse e di që ka dhënë gjithçka që mundej”, deklaroi trajneri.

Ai kërkoi përkushtim të plotë, përqendrim dhe dëshirë për të arritur rezultatin.

“Çdo pikë djerse, çdo përkushtim të mundshëm, çdo vëmendje të mundshme, të gjithë zemrën, të gjithë dëshirën për rezultat, çdo gjë që nevojitet, atëherë sipas meje ka bërë ndeshjen”, theksoi Maran.

“Rezultati nuk dihet, por e di që nëse vihet kjo në fushë, përqindja e arritjes së rezultatit rritet shumë”, përfundoi ai.

Shqipëria kryeson Grupin 1 të Ligës C me nëntë pikë, dy më shumë se Finlanda dhe Bjellorusia. Kuqezinjtë synojnë të ruajnë vendin e parë dhe të sigurojnë rikthimin në Ligën B, ndërsa pas Finlandës do të përballen me Bjellorusinë më 15 nëntor.