TË FUNDIT
Kthehu te lajmet
Kombëtare

Maran ndryshon listën para San Marinos, largohen Fetai dhe Sina

Dy futbollistë janë larguar nga grumbullimi i Kombëtares shqiptare përpara ndeshjes ndaj San Marinos.

Maran ndryshon listën para San Marinos, largohen Fetai dhe Sina

Dy futbollistë janë larguar nga grumbullimi i Kombëtares shqiptare përpara ndeshjes ndaj San Marinos. Feta Fetai dhe Samuele Sina i janë bashkuar Shqipërisë U-21, ndërsa Rolando Maran ka rikthyer në grup Luis Hasën dhe Simon Simonin.

Fetai dhe Sina do të jenë në dispozicion të trajnerit Alban Bushi për miqësoren kundër Ukrainës U-21, e programuar të luhet më 5 tetor, në orën 15:30, në Hungari.

Vendimi për transferimin e tyre te Shpresat vjen në një moment kur pritej që Maran të kryente rotacion ndaj San Marinos. Sina ishte titullar në ndeshjen e parë mes dy skuadrave, ndërsa Fetai qëndroi në pankinë kundër Finlandës.

Hasa rikthehet, Simoni zëvendëson Berishën

Lajmi pozitiv për kuqezinjtë është rikthimi i Luis Hasës. Mesfushori ka kaluar problemet shëndetësore që e penguan të udhëtonte drejt Helsinkit dhe është bashkuar sërish me skuadrën.

Në grup është thirrur edhe Simon Simoni. Portieri do të zëvendësojë Etrit Berishën, i cili nuk mund të luajë ndaj San Marinos pas kartonit të kuq të marrë në humbjen 2-1 kundër Finlandës.

Kombëtarja nis përgatitjet

Pas kthimit nga Helsinki, skuadra zhvilloi seancën e parë në “Shtëpinë e Futbollit”. Lojtarët që nuk u aktivizuan ndaj Finlandës punuan me ngarkesë të plotë, ndërsa titullarët zhvilluan ushtrime rikuperuese dhe fizioterapi.

Shqipëria do të presë San Marinon më 6 tetor, në orën 20:45, në stadiumin “Air Albania”. Kuqezinjtë kërkojnë të rikthehen te fitorja pas humbjes në Finlandë dhe të qëndrojnë në garë për vendin e parë në grup.