TË FUNDIT
Kthehu te lajmet
Kombëtare

Maran ndryshon Shqipërinë ndaj San Marinos, pritet debutimi i Sinës

Shqipëria do të rikthehet në fushë më 29 shtator, në orën 20:45, për ndeshjen në transfertë ndaj San Marinos. Kuqezinjtë konsiderohen favoritë absolutë përballë përfaqësueses që renditet e fundit në klasifikimin e FIFA-s dhe kërkojnë fitoren e dytë në Ligën e Kombeve.

Maran ndryshon Shqipërinë ndaj San Marinos, pritet debutimi i Sinës

Shqipëria do të rikthehet në fushë më 29 shtator, në orën 20:45, për ndeshjen në transfertë ndaj San Marinos. Kuqezinjtë konsiderohen favoritë absolutë përballë përfaqësueses që renditet e fundit në klasifikimin e FIFA-s dhe kërkojnë fitoren e dytë në Ligën e Kombeve.

Pas suksesit 2-0 ndaj Bjellorusisë, trajneri Rolando Maran pritet të bëjë disa ndryshime në formacion, duke u dhënë mundësi edhe lojtarëve që nuk u aktivizuan si titullarë në ndeshjen e parë.

Risia kryesore pritet të jetë Samuele Sina. Mbrojtësi 19-vjeçar projektohet të debutojë me Kombëtaren, duke marrë vendin e Elseid Hysajt në krahun e djathtë. Vetë Maran kishte sinjalizuar se i riu mund të përdorej në këtë pozicion.

Pushim pritet të marrin edhe Stavro Pilo dhe Ylber Ramadani. Dy futbollistët u ndëshkuan me karton të verdhë ndaj Bjellorusisë dhe stafi teknik nuk dëshiron të rrezikojë praninë e tyre në sfidën e rëndësishme kundër Finlandës. Mario Mitaj pritet të zëvendësojë Pilon, ndërsa në mesfushë Medon Berisha Shehu projektohet përkrah Kristjan Asllanit.

Ndryshime priten edhe në repartin ofensiv. Taulant Seferi dhe Arbër Hoxha mund ta nisin nga stoli, me Anis Mehmetin dhe Myrto Uzunin që shihen si favoritë për fanellën e titullarit.

Nga ekipi që e nisi ndeshjen kundër Bjellorusisë pritet të konfirmohen Etrit Berisha, Ardian Ismajli, Berat Gjimshiti, Kristjan Asllani, Ernest Muçi dhe Rei Manaj.

Formacioni i mundshëm i Shqipërisë (4-2-3-1)

Berisha; Sina, Ismajli, Gjimshiti, Mitaj; Asllani, Shehu; Mehmeti, Muçi, Uzuni; Manaj.